Ad chutara da łofta
Kolki kaštuje nieruchomaść u Vilni?
Nieruchomaść u Litvie zaŭždy pryvablivała biełarusaŭ. Adnym padabajecca duch staroj stalicy VKŁ, inšym — vid na žycharstva ŭ jakaści bonusa. Kupić kvateru ŭ Vilni, kab mieć ułasny «pieravałačny» punkt u Jeŭropie, — niadrennaja inviestycyja. Jakuju nieruchomaść nabyvajuć našyja suajčyńniki i ź jakimi prablemami sutykajucca pry kupli?
Chutary dla žycharstva
Vijaleta Mikačyŭńjenie pracuje ŭ adnoj z najbujniejšych ryełtarskich kantor Vilni — Amrec.lt — i jašče pry telefanavańni, kali daviedvajecca, što ja z Biełarusi, uzhadvaje pra chutary.
Chutar u Litvie — vielmi «modny» vid nieruchomaści, asabliva siarod zamiežnikaŭ. «Časam navat strašna padumać, što ludzi chočuć znajści, — kaža Vijaleta. — Možna kupić chutar i za $18—20 tysiač. Jon budzie pobač ź Vilniaj, ale tam nie budzie nijakich kamunikacyj, jak i vyhodaŭ — ni elektryčnaści, ni vady. Ale ludzi kuplajuć».
Košt farmujecca pa nastupnych kryterach: pamier učastka, stan daroh, addalenaść ad horada, stan chaty, najaŭnaść elektryčnaści, sistema aciapleńnia.«Nam davodziłasia pradavać chutary i za $500 tysiač, — raskazvaje Vijaleta. — A dla biełarusaŭ najbolš cikavymi buduć chutary, jakija znachodziacca ŭ zonie pamiž biełaruskaj miažoj i Vilniaj. Za $50 tysiač možna kupić vydatny chutar, jaki budzie niedaloka ad stalicy.
Kvatera navyrast
Bližejšyja hod-dva ceny zastanucca pryblizna takimi samymi, miarkujuć ryełtary. Ceny trymajucca ŭžo amal dva hady, i nijakich prykmietaŭ ich chutkaha rostu niama.
«Na minułym tydni ja jakraz pracavała ź biełarusami, jakija kuplali kvateru dla dziaciej «navyrast», — kaža Vijaleta. — Ludzi kuplajuć žytło na budučyniu — paśla dzieci padrastuć i zmohuć siudy pierajechać.
U vyniku maje klijenty kupili kvateru-paŭtaračku za $62 tysiačy z meblaj, džakuzi, płaźmiennym televizaram i ŭsioj patrebnaj technikaj.
Kali kuplać kvateru, u jakoj možna prosta «časam spynicca», novabudoŭli — samy zručny varyjant. Ich možna padzialić na niekalki katehoryj: ekanamkłas (da $1700 za kvadratny mietr), siaredni kłas (ad $1700 da $2250) i prestyžny kłas ($2300). Havorka idzie pra kvatery biez adździełki.
Kupicie vodanapornuju viežu
Niezaležny ryełtar Arturas Jasajcis viedaje vialikuju kolkaść «niezvyčajnaha žytła» ŭ Vilni. Naprykład, na vulicy Biernardzinskaj možna nabyć… dzirku pamiž damoŭ: tam źjaviłasia trochpaviarchovaja małahabarytnaja samarobnaja kvatera, z vyhodami na pieršym paviersie i žyłymi pamiaškańniami na astatnich dvuch. «Žyć u takoj nielha, — kaža Jasajcis. — Adnak spynicca na noč možna. Jana, darečy, ciapier zdajecca». Kaštuje takaja kvatera pryblizna $45 tysiač.
«Aproč taho, jość vialiki popyt na łofty i mansardy, — raskazvaje Arturas. — Jość i šykoŭnyja kvatery ŭ dvuchpaviarchovikach u Zareččy (artystyčny rajon niepadaloku ad centra), z najlepšym vidam na horad, jaki tolki možna znajści. Adnak na canu, mienšuju za $80 tysiač, i raźličvać nie davodzicca. A ŭvohule pradajecca ŭsio — u Zareččy na prodaž była vystaŭlena vodanapornaja vieža. Zdajecca, ciapier tablička «pradajecca» ź jaje źnikła».
Kamunałka jak prablema
Litoŭcy skardziacca na sumy, jakija davodzicca vydatkoŭvać na kamunalnyja pasłuhi. Za vialikuju trochpakajoŭku ŭ centry za adno aciapleńnie zimoj daviadziecca płacić da $300 u miesiac. U starych damach z praviedzienym «kapramontam» hetaja suma ŭdvaja mienšaja. A ŭ novych, enierhaźbierahalnych budynkach žyroŭki zusim prymalnyja — ad $0,75 za kvadrat.
Jašče adna akaličnaść, ź jakoj sutykajucca žychary starych budynkaŭ, heta zachavańnie kulturnaj spadčyny: takija kvatery nielha pierabudoŭvać ci rabić pierapłaniroŭku.
Košty za kvadratny mietr
Samyja darahija rajony:
Centr, Stary horad, Zarečča, Vałakupy — $1300—4000
Prestyžnyja rajony:
Antokal, Źviaryniec, Novaje Miesta — $1100—2600
Prestyžnyja spalnyja rajony:
Ijeruzalim, Bialiny, Žyrmuny, Fabijoniški, Pašyłajčy, Kurhany — $1300—2000
Spalnyja rajony siaredniaha kłasa:
Šyški, Justyniški, Ładzinaj, Karaliniški, Viršuliški — $1000—2000
Nieprestyžnyja rajony:
Navinki, Novaja Vilnia, Nižnija Panary, Hryhiški — ad $550
***
Łoft - haryšča, mansarda ci byłoje zavodskaje pamiaškańnie, pieraroblenaje pad kvateru.