Śpis niemateryjalnaj spadčyny papoŭniŭsia ihryščam, abradam i technałohijaj
Śpis niemateryjalnaj kulturnaj spadčyny Biełarusi papoŭniŭsia tryma historyka‑kulturnymi kaštoŭnaściami. Pra heta paviedamili ŭ Ministerstvie kultury.
Na pasiadžeńni navukova‑mietadyčnaj rady pa pytańniach achovy historyka‑kulturnaj spadčyny pry Ministerstvie kultury pryniata rašeńnie
nadać taki status kaladnaj hulni «Žanićba Ciareški», jakaja prachodzić u Lepielskim rajonie Viciebskaj vobłaści.
Hety abrad śviata šanuje i zachoŭvaje miascovaja moładź. Darečy, abrad uklučany ŭ turystyčny maršrut pa Lepielskim rajonie «Kraj žoŭtych harłačykaŭ i sivych vałunoŭ». Heta hulnia dla niezamužnich dziaŭčat i niežanatych junakoŭ, jakija dziakujučy ŭdziełu ŭ tancach, konkursach, śpievach znachodziać sabie pary. Usia hulnia prachodzić pad nahladam i z udziełam darosłych žycharoŭ vioski.
Taksama ŭ śpis uvajšoŭ abrad «Naŭski Vialikdzień», jaki možna ŭbačyć ŭ vioscy Abrova Ivacevickaha rajona Bresckaj vobłaści.
Pieršapryčynaj źjaŭleńnia takoha śviata stała zbaŭleńnie toj vioski ad maravoj chvaroby i śmierci dziaciej, jakoje zdaryłasia ŭ pačatku XX stahodździa. Kab vyratavać dziaciej, žychary vioski vykanali abrad, charakterny dla Zachodniaha Paleśsia, — stvaryli za adnu noč śpiecyjalny ručnik i razam z abrazom Božaj Maci prajšli chresnym chodam kruhom vioski, paśla čaho chvaroba adstupiła.
Śpis papoŭniŭsia i technałohijaj stvareńnia majstrami Kruhlanskaha rajona Mahiloŭskaj vobłaści draŭlanych muzyčnych narodnych instrumientaŭ.
Samymi zapatrabavanymi byli šumavyja, udarnyja, duchavyja instrumienty. Da niadaŭniaha času byli viadomy proźviščy takich pryznanych majstroŭ, jak Klimovič z Babrujskaha rajona, Bašan z Hłuskaha i inšyja. Da hetych słaŭnych imion ciapier možna adnieści i Alaksandra Charkieviča, jaki stvaryŭ sapraŭdny arkiestr z troch dziesiatkaŭ draŭlanych muzyčnych instrumientaŭ.
