Pa spravie ab «masavych biesparadkach» u Breście sudziać jašče 12 čałaviek, ź ich troje niepaŭnaletnich
11 červienia ŭ Leninskim rajonnym sudzie Bresta pačaŭsia sud nad čaćviortaj častkaj fihurantaŭ, jakich vinavaciać va ŭdziele ŭ masavych biesparadkach (č. 2 art. 293 Kryminalnaha kodeksa).
BiełTA
Siońnia ranicaj prajšło pieršaje pasiadžeńnie, nastupnaje pryznačanaje na 16 červienia.
Bieraściejcam pahražaje ad 3 da 8 hadoŭ pazbaŭleńnia voli. Spravu razhladaje cudździa Leninskaha rajona Dźmitryj Šuryn, piša Radyjo Svaboda.
Na łavie padsudnych 12 čałaviek:
- Mark Antonaŭ
- Śviatasłaŭ Hierasimuk (17 krasavika ŭziaŭ šlub u SIZA)
- David Zbaranski (sustreŭ 18-hodździe ŭ SIZA)
- Maksim Imchovik (niepaŭnaletni)
- Valery Mielničuk
- Ivan Paciejčuk (niepaŭnaletni)
- Jaŭhien Piekač
- Marek Siradze
- Andrej Tarasaviec
- Viačasłaŭ Trafimuk
- Alaksandr Cimafiejeŭ
- Aleh Juraŭ (niepaŭnaletni)
Dziaržabvinavaŭca śćviardžaje, što padsudnyja 10 žniŭnia padčas niesankcyjanavanaha masavaha mierapryjemstva ŭ centry Bresta — na vulicach Savieckaj i Naftavaj, bulvarach Šaŭčenki i Kasmanaŭtaŭ, praśpiekcie Mašerava — hruba parušyli hramadski paradak i nibyta ŭčynili pahromy.
U vyniku biesparadkaŭ, pa viersii śledstva, paciarpieli bolš za 20 siłavikoŭ. Ahulnuju sumu naniesienaj škody śledstva acaniła ŭ 24 tysiačy rubloŭ (paškodžana 13 aŭtamabilaŭ milicyi, adzin aŭtobus, ščyty, šlemy, broniekamizelki, asfalt, tratuarnaja plitka, łaŭki, śmietnicy, drevy).
***
U spravie ab «masavych biesparadkach» u Breście na hety momant ahułam asudzili ŭžo 22 čałavieki. Tak, 10 sakavika sudździa Viera Fiłonik asudziła dzieviać čałaviek na terminy ad 3 da 4,5 hoda kałonii. Niepaŭnaletnija Siarhiej Hackievič i Dzianis Chaziej atrymali 3 hady vychavaŭčaj kałonii.
21 maja Andrej Hruško prysudziŭ jašče 13 fihurantam ad 3 hadoŭ vychavaŭčaj kałonii da 5 hadoŭ. Siarod abvinavačanych była i dziaŭčyna asudžanaha Dzianisa Chazieja 18-hadovaja Vitalija Bandarenka. Jaje pakarali 4 hadami kałonii ahulnaha režymu.
Sud nad treciaj častkaj abvinavačanych praciahvajecca z 28 maja pa siońniašni dzień. U spravie prachodziać 13 fihurantaŭ.