Mahiloŭskaha pravaabaroncu Vaładara Curpanava, asudžanaha na chimiju, adpravili ŭ kałoniju na 2 hady
Pravaabaroncu z Mahilova Vaładara Curpanava adpravili ŭ kałoniju na 2 hady za ŭchileńnie ad adbyvańnia pakarańnia ŭ papraŭčaj ustanovie adkrytaha typu (art. 415 KK).
Padstavaj dla kryminalnaha pieraśledu asudžanaha na try hady chimii aktyvista stali dyscyplinarnyja spahnańni za parušeńnie ŭnutranaha rasparadku, piša Radyjo Svaboda.
Praces prachodziŭ u sudzie Kruhlanskaha rajona pad staršynstvam sudździ Dźmitryja Sasnoŭskaha. Dziaržaŭnaje abvinavačańnie pradstaŭlaŭ prakuror rajona Michaił Androsienka. Padsudny baraniŭ siabie sam.
U apošnim słovie Vaładar Curpanaŭ zajaviŭ, što jaho niezakonna i niespraviadliva ŭziali pad vartu. Jon nazvaŭ inkryminavany jamu artykuł «rudymientam hułahaŭskaj sistemy pakarańnia», jaki maje być skasavanym.
Curpanaŭ adbyvaŭ pakarańnie za abrazu dźviuch mahiloŭskich sudźziaŭ Viktoryi Palakovaj i Volhi Kraŭčanki. U Kruhlanskaj papraŭčaj ustanovie № 46 aktyvist prabyŭ z 5 lutaha pa 10 sakavika 2021 hoda. Za hety čas na jaho nakłali try spahnańni i pastavili na prafiłaktyčny ŭlik jak schilnaha da ekstremisckaj i inšaj destruktyŭnaj dziejnaści.
Sam jon na svajoj staroncy ŭ Facebook śćviardžaŭ, što sprava zaviedzienaja ŭ dačynieńni da jaho za toje, što jon zhadžaŭsia pracavać tolki pry vykanańni jaho pracoŭnych pravoŭ pry adbyćci «chimii» — patrabavaŭ zarobak, jaki adpaviadaje minimalnamu pamieru, harantavanym dziaržavaj.
Čytajcie taksama:
Mahiloŭskaha aktyvista, jaki zaklikaŭ u škole piedahohaŭ pakajacca, asudzili na 20 sutak
«Ličyli za aŭtaryteta». Adzin ź lidaraŭ mahiloŭskich pratestaŭ Vaładar Curpanaŭ raspavioŭ pra dni ŭ niavoli
Mahiloŭskamu aktyvistu Curpanavu prysudzili try hady «chimii» za abrazu sudździaŭ
