Kankurent SpaceX papiaredžvaje, što dziejańni kampanii mohuć zrabić jaje manapalistam u kosmasie
Prablema ŭ novych spadarožnikach dla interneta.
Fota habr.com.
Aktyŭnaja raspracoŭka kampanijaj SpaceX technałohii pradastaŭleńnia nterneta praz spadarožniki moža chutka pryvieści da faktyčnaj manapalizacyi kampanijaj kaśmičnaj śfiery. Pra heta papiaredziŭ kiraŭnik kampanii-kankurenta SpaceX, jeŭrapiejskaj Arianespace.
Na nizkaj arbicie Ziamli ŭžo znachodziacca 1677 spadarožnikaŭ kampanii Iłana Maska, jakija pracujuć tam u ramkach prahramy Starlink. Jana pavinna pradastavić nadziejny internet u tyja rehijony, dzie isnujuć prablemy z vałakonnym šyrokapałosnym internetam. Pry hetym usie spadarožniki ŭ kosmas dastaŭlaje rakieta, jakoj vałodaje i jakuju kantraluje SpaceX, piša Daily Mail.
Zaraz kampanija zaprasiła ŭ amierykanskaj Fiederalnaj kamisii pa suviazi dazvoł zapuścić u kosmas jašče 42 tysiačy spadarožnikaŭ. Ale kiraŭnik Arianespace Stefan Izrael ličyć, što praz takuju kolkaść spadarožnikaŭ SpaceX inšym kampanijam budzie ciažka zapuskać svaje kaśmičnyja aparaty, bo ŭźniknie ryzyka radyjopieraškod ci sutyknieńnia dvuch abjektaŭ.
Jak kaža Izrael, zaraz 35% usich aktyŭnych spadarožnikaŭ naležać kampanii SpaceX. Jon nazyvaje situacyju, kali na adnolkavaj vyšyni znachodziacca šmat spadarožnikaŭ, ryzykoŭnaj, i ličyć, što praz heta chutka čałaviectva moža ŭvohule stracić mahčymaść pracavać na hetaj arbicie.
Technałohija spadarožnikavaha interneta źjaviłasia raniej za Starlink, ale raniej jana pradastaŭlała zanadta pavolny i nienadziejny dostup da sieciva. Ad prajektu kampanii SpaceX čakajuć bolšaj efiektyŭnaści. Spadarožnikavy internet ad Iłana Maska, chutčej za ŭsio, budzie tannym. Kali vieryć pradstaŭnikam kampanii, im zmohuć skarystacca kala troch miljardaŭ čałaviek.
