Ekzaškilety: novy trend, jaki chutka ŭvojdzie ŭ naša žyćcio
Ujavicie vysokatechnałahičny broniekamplekt, što zrobić vas bolš mocnym.
Fota wikimedia.org
Taki pradmiet — ekzaškilet — isnuje ŭ sapraŭdnym žyćci, i ŭ jaho vialikaja budučynia. Možna apisać ekzaškilet jak źniešniuju pryładu, što padtrymlivaje i abaraniaje karystalnika i pry hetym robić jaho bolš dužym i niastomnym. Časam ich nazyvajuć «robaty, jakich možna nasić na sabie».
Ekzaškilety mohuć pracavać na akumulatary, a kiravać imi možna z dapamohaj kampjutara. Kanstrukcyja takich pryładaŭ moža abjadnoŭvać ruchaviki i hidraŭliku. Ale ekzaškilety možna zrabić i bolš prostymi, takimi, što buduć pracavać na resorach i amartyzatarach, piša VVS.
Raniej ekzaškilety ŭ asnoŭnym vykarystoŭvali ŭ vajskovaj i miedycynskaj śfiery, ale ŭ apošnija hady śfiera ich užyvańnia istotna pašyryłasia. Ekzaškilety vykarystoŭvajuć u pramysłovaści, bo praca ŭ hetaj śfiery źviazanaja ź vialikim uzroŭniem stomlenaści i ryzyki. Zvyčajnyja ž ludzi, asabliva z chvarobami aporna-ruchalnaha aparata, mohuć z dapamohaj ekzaškiletaŭ lahčej rabić paŭsiadzionnyja rečy — ad chatniaj pracy da špacyraŭ i sportu.
Tamu varta čakać vialikaha rostu popytu na ekzaškilety. Zhodna z daśledavańniem markietynhavaj struktury ABI Research, za čas z 2020 da 2030 hadoŭ suśvietnyja prybytki ŭ hetaj śfiery vyrastuć z 392 miljonaŭ dalaraŭ da 6,8 miljardaŭ dalaraŭ.
Samyja prahresiŭnyja ekzaškilety pracujuć ź sistemami štučnaha intelekta — prahramami, jakija mohuć da niejkaj stupieni sami navučacca i adaptavacca. Prafiesarka Sandra Ŭočter, staršaja navukovaja supracoŭnica ŭ śfiery štučnaha intelekta ŭ Oksfardskim univiersitecie, vitaje takoje novaŭviadzieńnie, ale kaža, što da jaho treba stavicca ź niekatoraj zaściarohaj.
Ekśpiertka ličyć, što kali robaty pačnuć kantralavać pracoŭny praces, heta moža być niebiaśpiečnym. Naprykład, sistema pačnie adsočvać ruchi karystalnika i intensiŭnaść pracy, dalej budzie paraŭnoŭvać jaje z pracaj inšych ludziej i rabić niekarektnyja vysnovy.
Zaraz, adnak, isnuje šerah faktaraŭ, što strymlivajuć raspaŭsiud ekzaškiletaŭ. Siarod ich — jomistaść akumulatara, abmiežavany dyjapazon ruchaŭ i darahavizna. Zaraz ekzaškilet na ŭsio cieła kaštuje ŭ siarednim 45 tysiač dalaraŭ, ale ekśpierty čakajuć, što ź ciaham času cana źnizicca.
