Ułady zabaraniajuć strymy z masavych akcyj
Deputaty pryniali ŭ pieršym čytańni zakonaprajekt «Ab masavych mierapryjemstvach u Biełarusi». Zakonaprajekt pradstaŭlaŭ u parłamiencie ministr unutranych spraŭ Ivan Kubrakoŭ, piša BiełTA.
Fota Nadziei Bužan
Voś asnoŭnyja źmieny:
1) Admianiajecca paviedamlalny paradak arhanizacyi i praviadzieńnia masavych mierapryjemstvaŭ. Raniej isnavaŭ śpis miescaŭ, u jakich možna było pravodzić lubyja mitynhi, zaklučyŭšy damovu ź miedykami i milicyjaj — naprykład, kala płoščy Banhałor.
Zrešty, hety paradak usio adno nie pracavaŭ — milicyja admaŭlałasia padpisvać damovu z arhanizatarami Dnia Voli.
Ciapier usie masavyja mierapryjemstvy mohuć pravodzicca vyklučna na padstavie dazvołu miascovych orhanaŭ ułady.
2) Zabaraniajecca aśviatleńnie ŭ režymie realnaha času niedazvolenych masavych mierapryjemstvaŭ «z metaj ich papularyzacyi abo prapahandy».
Što majecca na ŭvazie? Najchutčej, zabaraniajucca strymy z akcyj. Adnak pačynajučy ź leta 2020 hoda strymy faktyčna i nie pravodzilisia.
3) «Na žurnalistaŭ raspaŭsiudžvajecca patrabavańnie pa vykanańni hramadskaha paradku naroŭni z udzielnikami masavych mierapryjemstvaŭ».
Mahčyma, heta fraza maje na ŭvazie, što žurnalistaŭ buduć pryciahvać da adkaznaści za pracu na niedazvolenych mierapryjemstvach. Ale kab vynieści za dužki žurnalistaŭ dziaržaŭnych ŚMI, to ŭdakładniajecca, što karać buduć tolki tych, chto «parušaje hramadski paradak».
«Žurnalistam budzie zabaroniena vykonvać rasparadčyja funkcyi na masavym mierapryjemstvie». Što majecca na ŭvazie, niezrazumieła.
Źmieny ŭ zakanadaŭstvie pavinny być zaćvierdžanyja Pałataj pradstaŭnikoŭ u niekalkich čytańniach, a taksama Savietam Respubliki i kiraŭnikom krainy. Paśla hetaha jany nabuduć siłu.
