Žychara Viciebska, chvoraha na ankałohiju, asudzili na try z pałovaj hady kałonii za hvałt suprać milicyi
U sudzie Pieršamajskaha rajona Viciebska 1 sakavika vynieśli abvinavaŭčy prysud u dačynieńni da 54-hadovaha Uładzimira Małachoŭskaha, jakomu inkryminavali hvałtoŭnyja dziejańni suprać milicyjantaŭ (art. 364 KK). Sudździa Taćciana Rodzina pryznała viciablanina vinavatym i pakarała pazbaŭleńniem voli na 3 hady i 6 miesiacaŭ u kałonii ahulnaha režymu, paviedamlaje «Viciebskaja Viasna».
«Toje, što my pačuli, heta, viadoma, šok! Jany nie ŭličyli naohuł ničoha: toje, što čałaviek chvory na ankałohiju, što čałavieku patrabujecca abśledavańnie dva razy na hod u abaviazkovym paradku. Jany nie ŭličyli, što ŭ jaho dvoje małaletnich dziaciej», — skazała paśla abviaščeńnia prysudu svajačka Uładzimira Małachoŭskaha Łarysa, jakoj udałosia trapić u sudovuju zału.
Žurnalistaŭ, pravaabaroncaŭ i słuchačoŭ na abviaščeńnie prysudu nie puścili. Naohuł, praces nad Małachoŭskim prachodziŭ praktyčna ŭ zakrytym režymie.
Zhodna z prysudam, Uładzimir Małachoŭski musić taksama vypłacić ahułam 3000 rubloŭ maralnaj kampiensacyi paciarpiełym milicyjantam — Kačychinu, Jemialjanavu i Paźniakovu.
Małachoŭski svajoj viny nie pryznaŭ.
Prakurorka padčas sprečak bakoŭ prasiła dla Małachoŭskaha 6 hadoŭ źniavoleńnia. Sudździa Taćciana Rodzina prysudziła try z pałovaj hady kałonii ahulnaha režymu.