Łukašenka pra sankcyi da Biełarusi i Rasii: Što my parymsia, my sami možam siabie zabiaśpiečyć
Pra heta jon zajaviŭ siońnia na sustrečy ź dziaržaŭnym sakratarom Sajuznaj dziaržavy Ryhoram Rapotam, piša BiełTA.
«Rasiju, hetak ža jak i nas, usie sprabujuć napałochać niejkimi sankcyjami. Ja z savieckaha času. Viedaju, što takoje Dziaržpłan, jak płanavałasia. Ja tak prykinuŭ, boža moj, čaho my trymcim i parymsia. My možam usio praličyć i całkam siabie zabiaśpiečyć.
Za vyklučeńniem niekatorych detalaŭ. Tak my na praciahu 3-5 hadoŭ i detali tyja vyrabim u Biełarusi i Rasii. U nas taki navukovy patencyjał!
I kali b my heta zrabili, to i Ukraina b da nas pavoli padciahnułasia. Ja ŭžo nie kažu pra Kazachstan i inšyja respubliki, jakija i tak niedalokija ad nas. Tamu heta hałoŭnaje pytańnie — damovicca i zabiaśpiečyć našu Ajčynu ŭsim nieabchodnym».
Łukašenka źviarnuŭ uvahu, što krainy razam mohuć paśpiachova pracavać faktyčna va ŭsich śfierach, niachaj heta budzie kosmas, bijatechnałohii, elektramabili i inšaje. «My ŭsio ŭmiejem rabić. Prosta libierały kaliści nas pierakanali: rynak usio adrehuluje. Dy čorta z dva», — skazaŭ jon.
U paćviardžeńnie hetaha tezisa jon pryvioŭ prykład, što ŭ Japonii i Kitai składajuć tysiačy płanaŭ i roznych bałansaŭ. I heta nie tolki indykatyŭnyja płany, ale i prapisanyja na praktycy. I druhoje — žaleznaja dyscyplina. Łukašenka raspavioŭ pra daŭniuju razmovu z adnym ź japoncaŭ padčas naviedvańnia zimovaj Alimpijady ŭ Nahana (1998 hod), jaki padzialiŭsia mierkavańniem, u čym roźnica pamiž Japonijaj i postsavieckimi krainami. «Jon kaža: u nas rašeńnie prymaje adzin, a 99 biez abmierkavańnia vykonvajuć usio. A ŭ vas naadvarot — 99 razvažajuć, prymajuć rašeńnie, a adnamu davodzicca niešta rabić. Heta japoniec skazaŭ. Voś dyscyplina — jany damovilisia i žalezabietonna heta vykonvajuć. I ŭ Kitai taksama. Tamu jany i viadučyja ekanomiki śvietu. I my možam heta zrabić», — upeŭnieny Łukašenka.
Tamu, ličyć jon, nie varta asabliva pieražyvać z nahody ŭviadzieńnia tych ci inšych sankcyj. «Dobra, uvodźcie. Ale svaje tavary budziecie spažyvać u siabie, na naš rynak nie pryjdziecie. Heta ŭsio-taki 150 młn čałaviek. A praź Biełaruś, Rasiju prachodzić vielizarnaja kolkaść tavaraŭ. Tamu zrazumieła, chto ad hetaha prajhraje. A my ŭsie pieražyvajem: ach, sankcyi, my pamrom… Dy nie pamrom! — padkreśliŭ Łukašenka. — Siarhiej Łaŭroŭ (ministr zamiežnych spraŭ Rasii) pravilna skazaŭ, žorstka skazaŭ, małajčyna!
Nie treba suprać nas vajnušku niejkuju ładzić. My možam adkazać. Kali chočam žyć mirna, treba sapraŭdy rychtavacca da vajny. My, viadoma, nie chočam vajavać, nam nie treba, my najelisia. Ale tym nie mienš vy bačycie, što adbyvajecca vakoł».
