22 studzienia Rada Biaśpieki AAN sustreniecca ź Cichanoŭskaj. Pradstaŭnik Rasii: heta palityzacyja
Tema Biełarusi nie maje nijakaha dačynieńnia da Rady Biaśpieki AAN, i sproby jaje abmierkavać palityzavanyja. Pra heta zajaviŭ u piatnicu TASS pastajanny pradstaŭnik Rasii pry arhanizacyi Abjadnanych Nacyj Vasil Niabienzia.
«Całkam vidavočna, što situacyja ŭ Biełarusi nie maje dačynieńnia da Rady Biaśpieki. Situacyja tam nie ŭjaŭlaje saboj nijakaj pahrozy miru i biaśpiecy, — skazaŭ jon. — Heta vidavočnaja palityzacyja, imknieńnie znoŭ vyciahnuć hetuju temu na pavierchniu. Inicyjatarami tut vystupajuć našy prybałtyjskija kalehi z Estonii, jakija vynosiać hetuju temu na abmierkavańnie nie pieršy raz».
«My mahli b takim ža čynam abmiarkoŭvać mnohaje inšaje, što adbyvajecca ŭ śviecie, ale my da hetaha nie apuskajemsia. My viedajem mandat Rady Biaśpieki i nie pryŭnosim u abmierkavańnie staronnija temy», — padkreśliŭ Niabienzia.
22 studzienia pa inicyjatyvie Estonii, Francyi, Irłandyi, Narviehii, Vialikabrytanii i ZŠA Rada Biaśpieki praviadzie niefarmalnuju sustreču z udziełam Śviatłany Cichanoŭskaj. Pasiadžeńnie projdzie pa «formule Arya» — sustrečy ŭ hetym farmacie prachodziać nie ŭ zale Rady Biaśpieki, na ich nie vypracoŭvajecca nijakich rezalucyj abo inšych aficyjnych dakumientaŭ. Inšyja čalcy Rady pry žadańni mohuć admovicca ad udziełu ŭ sustrečy.
