Adnačasova z byłym i ciapierašnim ministrami achovy zdaroŭja orden atrymała kiraŭnica Biełstata
16 studzienia Alaksandr Łukašenka ŭručyŭ ordeny, miedali i padziaki prezidenta dziaržaŭnym dziejačam, artystam i supracoŭnikam srodkaŭ masavaj infarmacyi.
Źviarnuli ŭvahu «pakiety» ŭznaharodžanych. Napačatku nazvanyja Michaił Miaśnikovič i Natalla Kačanava. Pieršy ŭznaharodžany ordenam Ajčyny II stupieni. Druhaja atrymała z ruk Alaksandra Łukašenki orden Ajčyny III stupieni.
Orden Ajčyny III stupieni atrymaŭ i adzin z «hubiernataraŭ», vielmi niadaŭna pryznačany — kiraŭnik Hrodzienskaj vobłaści Uładzimir Karanik.
Raniej jon byŭ ministram achovy zdaroŭja. Staršynia Nacyjanalnaha statystyčnaha kamiteta Ina Miadźviedzieva i ministr achovy zdaroŭja Dźmitryj Pinievič udastojeny ordena Pašany.
Varta adznačyć, što Biełstat u 2020 hodzie ŭpieršyniu ŭ svajoj historyi zasakreciŭ statystyku śmiarotnaści ŭ krainie. Biełaruś — adzinaja jeŭrapiejskaja kraina, jakaja tak zrabiła.
Akramia taho, uznaharody nižejšaha ranhu atrymała vialikaja hrupa prapahandystaŭ radykalnaha tołku. Miedalom «Za advahu» ŭznaharodžany śpiecyjalny karespandent telekanała STB Ryhor Azaronak, miedalom «Za pracoŭnyja zasłuhi» — ahladalnik adździeła vydavieckaha doma «Biełaruś siehodnia» Andrej Mukavozčyk i hałoŭny savietnik pres-słužby Prezidenta Valeryj Šulha, miedalom Francyska Skaryny — redaktar adździeła vydavieckaha doma «Biełaruś siehodnia» Dźmitryj Krat i śpiecyjalny karespandent telekanała ANT Ihar Tur.
Akramia ich, uznaharody atrymała hrupa artystaŭ, jakaja adznačyłasia ŭdziełam u aŭtaprabiehach za Alaksandra Łukašenku, kancertach u jaho padtrymku i baraćbie ź biełaruskaj nacyjanalnaj simvolikaj.
