Homielskuju nastaŭnicu pakarali «sutkami» za karahod u lesie
11 studzienia sud Centralnaha rajonu pakaraŭ aryštam na troje sutak 57-hadovuju nastaŭnicu. Milicyja abvinavaciła jaje ŭ «niesankcyjanavanym mitynhu» — tak pravaachoŭnyja orhany rascanili karahod u lesie vakoł jalinki, piša Svaboda.
Spravu razhladaŭ sudździa Siarhiej Karmanovič.
Alena Litvinava piać sutak da sudu — z 6 studzienia — była ŭ izalatary časovaha ŭtrymańnia, choć zakanadaŭstva dazvalaje trymać čałavieka pa administracyjnaj spravie da sudu tolki 72 hadziny.
«Try razy ŭ izalatary ja prasiła vyklikać mnie lekara, bo było błaha z sercam, ale na maje skarhi nichto nie reahavaŭ», — adznačyła pierad sudom žycharka Homla.
Advakatka dałučyła da spravy medyčnyja dakumenty, jakija śviedčać pra zachvorvańni, i balničny list. Na momant zatrymańnia, 6 studzienia, nastaŭnica chvareła i lačyłasia ambulatorna. Viečaram 6 studzienia jana źbirałasia ŭ carkvu na słužbu z nahody Rastva, a apynułasia ŭ IČU. U jaje doma prajšoŭ vobšuk. «Mnie ničoha nie tłumačyli — što šukajuć, ź jakoj nahody prachodzić vobšuk», — kazała na sudzie Alena.
Advakatka źviarnuła ŭvahu, što Alenie nie pieradali leki, nie akazvali medyčnuju dapamohu, trymali bolš za 72 hadziny.
«Pravaparušeńnie nie dakazanaje. Majoj padabaronnaj nie tłumačyli pravy i abaviazki. Dokazy ŭ spravie — skrynšoty i zdymki, maja padabaronnaja nie paćvierdziła, jana na ich ci nie. Liču, što hetyja dokazy niedapuščalnyja, spravu treba spynić», — kazała advakatka.
Pavodle milicejskaha pratakołu, 25 śniežnia Alena «biez dazvołu vykankamu pryniała aktyŭny ŭdzieł u niesankcyjanavanym mitynhu ŭ lasnym masivie kala vioski Novaja Buchałaŭka». Tady hrupa žycharoŭ Homla zładziła navahodni piknik — vadzili ŭ lesie karahod vakoł jalinki, smažyli sała. Usie byli ŭ maskach. Niekatoryja mieli bieł-čyrvona-biełyja ściahi. Za hety piknik 59-hadovaja žycharka Homla ciapier adbyvaje 7-dzionny aryšt.
Sudździa patłumačyŭ, što pa milicejskich dakumentach nastaŭnica była zatrymanaja 9 studzienia. Što jana rabiła z 6 studzienia pa 9 studzienia ŭ IČU — nie dali adkaz ni milicyjanty, ni sud. Učastkovy Arciom Žaŭniak patłumačyŭ paśla sudu, što «6 studzienia jana była zatrymana pa adnym epizodzie, 9 studzienia — pa inšym».
Sudździa paraiŭ skardzicca, kali niešta nie zrazumieła. Sud skazaŭ ličyć pakarańnie z 9 studzienia, učastkovy — z 6 studzienia.
