Nievinavatamu inžynieru MZKC, jaki prasiadzieŭ čatyry hady ŭ SIZA, dziaržava zapłacić 40 tysiač rubloŭ
Fota Volhi Šukajła
Sud Maskoŭskaha rajona pastanaviŭ spahnać na karyść inžyniera MZKC Andreja Hałavača kampiensacyju maralnaj škody 40 tysiač rubloŭ (u pazovie było zajaŭlena 50 tysiač). Hałavač pravioŭ u SIZA pa pieršaj kryminalnaj spravie amal try hady i byŭ apraŭdany. Hrošy na kampiensacyju Minfin vydzielić ź biudžetu, piša Tut.by.
U lutym 2018 hoda sud Frunzienskaha rajona Minska vynies apraŭdalny prysud Andreju Hałavaču, jakoha abvinavačvali ŭ atrymańni chabaraŭ u asabliva bujnym pamiery (č. 3 art. 430 KK). Na toj momant jon pravioŭ u SIZA amal 3 hady. Adnak u dzień abviaščeńnia apraŭdalnaha prysudu byŭ tut ža zatrymany ŭ sudzie. Na jaho zaviali jašče adnu kryminalnuju spravu, taksama pa chabarach. Pa druhoj spravie jon znoŭ byŭ apraŭdany, ale pakul nie źviartaŭsia pa kampiensacyju.
Pa pieršaj ža spravie Hałavač zajaviŭ pazoŭ ab kampiensacyi 50 tysiač rubloŭ. Jaho advakat Alaksiej Švakaŭ tak rastłumačyŭ paznačanuju sumu:
— Dumaju, nie varta pieraličvać u padrabiaznaściach usie prablemy, vyklikanyja pazbaŭleńniem voli, heta samo pa sabie abmiežavańnie, kali niemahčyma mieć znosiny z rodnymi i blizkimi. Byli straty i na pracy. Andrej Hałavač — viadomy inžynier, u vyniku jaho reputacyja była pataptanaja. Infarmacyja nakont jaho abvinavačvańnia była dastupnaja ŭ ŚMI. Jon vyprabavaŭ maralnyja pakuty, jakija ŭ adpaviednaści z zakanadaŭstvam padlahajuć kampiensacyi.
Suma takaja, bo Hałavač praciahły termin znachodziŭsia ŭ izalacyi. Na dumku pazoŭščyka, hetaj sumy budzie dastatkova dla kampiensacyi.
Švakaŭ udakładniŭ: z samaha pačatku, z momantu zatrymańnia i dalej, na papiarednim śledstvie i ŭ sudzie, Andrej Hałavač nie pryznavaŭ siabie vinavatym. Pa spravie pracavali śledčy śledčaha kamiteta i apieratyŭniki HUBAZiK MUS. Sud u vyniku pryznaŭ prava Hałavača na pakryćcio škody.
Adznačym, što ŭ sudovaj praktycy byli vypadki, kali apraŭdanym admaŭlali ŭ kampiensacyi škody, pakolki ŭ chodzie kryminalnaha pracesu jany pryznavali vinu.
Pradstaŭnik Ministerstva finansaŭ, jaki siońnia taksama prysutničaŭ u sudzie, zajaviŭ, što viedamstva pryznaje prava Andreja Hałavača na pakryćcio škody. Što tyčycca sumy, Minfin pakinuŭ hetaje pytańnie na mierkavańnie suda, jaki ŭ vyniku pastanaviŭ spahnać na karyść inžyniera 40 tysiač rubloŭ. Pastanova moža być abskardžana.
Kampiensacyja vypłačvajecca sa srodkaŭ biudžetu, a nie z kašalka apieratyŭnikaŭ, śledčych i prakuroraŭ, jakija daviali spravu da suda, abo sudździaŭ, kali jany vynosiać abvinavaŭčy prysud, jaki paźniej admianiajecca, tamu i adkazčykam pa spravach ab kampiensacyi škody ŭ sudzie vystupaje Ministerstva finansaŭ, jakoje adkazvaje za kaznu.
Kali z boku milicyi i sudździaŭ byli parušeńni zakonu, heta asobnaje pytańnie, za heta ich pavinny pryciahnuć da adkaznaści — pravodzicca pravierka. Z punktu hledžańnia prava, spahaniać hrošy z sudździaŭ i pravaachoŭnikaŭ niapravilna, bo tady jość ryzyka, što naohuł nie budzie apraŭdalnych prysudaŭ (ich i tak u Biełarusi ŭsiaho 0,3%), a budzie bolš falsifikacyj na karyść vinavataści čałavieka. I sudździ, i milicyja dziejničajuć ad imia dziaržavy, tamu i kampiensacyja vypłačvajecca ad imia dziaržavy — ź biudžetu.
Druhi apraŭdalny prysud hałoŭnaha inžyniera MZKC byŭ abvieščany 19 lipienia 2019 hoda. Jon nieŭzabavie viarnuŭsia na zavod na raniejšuju pasadu. U Andreja Hałavača zastajecca prava patrabavać maralnuju kampiensacyju i pa druhim apraŭdalnym prysudzie.
