«Mianie zdała administracyja». Zvolnienaja vykładčyca MDŁU Natalla Dulina pra svoj aryšt
Natalla Dulina
Byłaja vykładčyca katedry italjanskaj movy ŭ MDŁU Natalla Dulina vyjšła na volu paśla 14 sutak administracyjnaha aryštu, jaki adbyvała ŭ IČU ŭ Baranavičach.
Natalla Dulina skazała «Svabodzie», što «kateharyčna» nia vierniecca va ŭniversytet i nia budzie sprabavać tam adnavicca.
«Pa-pieršaje, kali ja tudy viarnusia, to praciahnu rabić toje, što ja rabiła. Pakolki tam ničoha hlabalna nie pamianiałasia, my budziem chadzić pa kole, i mianie znoŭ, vidać, pavinny buduć zvolnić. Heta biessensoŭna. Pa-druhoje, ja viedaju dakładna, što mianie zdała našaja administracyja. To-bok ja była zatrymana pry jaje sudziejańni. Paśla hetaha mnie tudy naohuł nia chočacca iści».
Pavodle Natalli Dulinaj, novuju rektarku ŭniversytetu pastaviŭ Alaksandar Łukašenka, i tamu jana prymaje rašeńni, jak skaža ŭłada.
«Milicyjant skazaŭ, što ja nia maju prava znachodzicca va ŭniversytecie»
Natallu Dulinu zvolnili 29 kastryčnika, paśla taho jak jana padtrymała strajk va ŭniversytecie i studentaŭ, jakija ŭdzielničali ŭ akcyjach salidarnaści. Joj paviedamili, kab jana raśpisałasia ŭ zahadzie ab zvalnieńni i zabrała pracoŭnuju knižku. 30 kastryčnika jana pryjšła va ŭniversytet.
«U nas tam ciapier stajać milicyjanty, nibyta dla achovy. My nie zusim razumiejem ich funkcyju. Adzin ź milicyjantaŭ skazaŭ, što ja nia maju prava znachodzicca va ŭniversytecie, bo ja zvolnienaja. Ja skazała, što ničoha nie padpisvała, ciapier strajkuju. Jon pastajanna za mnoj chadziŭ, niekamu telefanavaŭ. My sa studentami pajšli ŭ aŭdytoryju, kab abmierkavać svaje plany, a milicyjant stajaŭ na ŭvachodzie».
Potym Natallu Dulinu vyklikaŭ dekan, jaki pieradaŭ patrabavańnie z adździełu kadraŭ: zdać paśviedčańnie.
«Kali ja zajšła na katedru, mnie patelefanavali, što na mianie abłava i ja pavinna prydumać, jak mnie syści z universytetu. Ja vyjšła za bramku ŭniversytetu, i da mianie padyšoŭ čałaviek: «Projdziem z nami». Spyniłasia mašyna DAI, mianie tudy pasadzili i pavieźli ŭ RUUS. To-bok universytet zrabiŭ usio, kab mianie paśpieć zvolnić i kab ja ŭ hety momant znachodziłasia za terytoryjaj universytetu. Heta było zroblena ź viedama kiraŭnictva».
«Mianie pryniali za arhanizatara, choć ja im nie była»
Natalla Dulina dałučyłasia da strajku 26 kastryčnika i aficyjna abviaściła studentam pra admienu zaniatkaŭ. Jana pieradała rektaru ŭviedamleńnie ad imia vykładčykaŭ, jakija taksama padtrymali strajk.
«Ja paprasiła zahadčyka katedry i studentaŭ, kab jany nie chavali pryčynu majoj adsutnaści, bo ja była na strajku, kab usia kraina bačyła našuju salidarnaść. Farmalna mianie zvolnili za prahuły, ale nasamreč z palityčnych pryčyn, — kaža Natalla Dulina. — Mianie pryniali za arhanizatara, choć ja im nie była. Ja ad pačatku padtrymała studentaŭ, jakija vyrašyli adkryta vykazvać svoj pratest, svaju hramadzianskuju pazycyju. Za heta jany paciarpieli na pačatku vieraśnia, kali ich zatrymlivali va ŭniversytecie. Ja nie mahła nie padtrymać ich, jak i mnohija inšyja vykładčyki».
Natalla Dulina brała ŭdzieł u videazvarocie sta saraka vykładčykaŭ, jakija patrabavali spynić hvałt i pravieści sumlennyja vybary.
«Ja ŭpieršyniu zapłakała ŭ turmie, kali atrymała stos listoŭ»
Paśla zatrymańnia ŭ pastarunku Natalla Dulina padpisała pratakoł, bo ŭ spravie byli fatazdymki, jakija paćviardžali jaje ŭdzieł u akcyi studentaŭ 26 kastryčnika ŭ dvoryku BDU. Potym jaje advieźli ŭ IČU na Akreścina, dzie jana była da 5 listapada. A potym razam ź inšymi ŭ aŭtazakach etapavali ŭ IČU ŭ Baranavičach.
«U nas była kamera na 19 miescaŭ. U cełym nijakich złoŭžyvańniaŭ ja nie zaŭvažyła: turma heta turma. Tam jość žorstkija praviły, naprykład, cełyja sutki haryć śviatło. Adzin raz nas vyvieli na špacyr na Akreścina i adzin raz u Baranavičach, astatniaje rabiłasia pa instrukcyjach. Ja była hatovaja da taho, što heta turma, i nie čakała nijakich pryjemnych siurpryzaŭ».
Razam z Natallaj Dulinaj siadzieli ludzi pa «absurdnych abvinavačańniach, ad jakich ściskałasia serca». Ale ŭsie prachodzili pa artykule 23.34.
«Heta byli ludzi roznych prafesij, i ź imi było lohka, bo ŭ nas mnoha supolnaha: intaresy, knihi, kino, — kaža Natalla Dulina. — Ja ŭpieršyniu zapłakała ŭ turmie, kali atrymała stos listoŭ navat ad nieznajomych ludziej. Ja zapłakała ad usplosku stanoŭčych emocyj».
Natalla Dulina kaža, što svaich svajakoŭ rychtavała da taho, što moža ź joj adbycca, i psychalahična jaje aryšt nia staŭ dla ich niečakanaściu.
«Nazvali hety malunak «12 apostałaŭ»»
U turmie Natalla Dulina namalavała niekalki malunkaŭ, adzin ź jakich raźmiaściła ŭ fejsbuku.
«U kamery ŭ Baranavičach na pamiać — fotaaparata nie było — ja namalavała ałoŭkam, jak ja heta bačyła. Kamera vialikaja, i, kali ja siadzieła na svaich narach, ja bačyła dva šerahi nar, pasiaredzinie doŭhi stoł i łaŭki. Dziaŭčaty śmiajalisia i nazvali hety malunak «12 apostałaŭ», bo na im było 12 čałaviek».
Adzin z malunkaŭ Natalla dasłała poštaj svajakam.
«Adna z sukamernic sumavała pa svajoj kotcy. Ja spytała, jak jana vyhladaje, i namalavała dla jaje hetuju kotku».
Z reštak chleba i mylnaj vady Natalla vylepiła fihurku kotki, miedźviedzianiatki i myški, ale na volu ich vynieści nie ŭdałosia, bo raskryšylisia.
«Prosta chaciełasia tam niečym zaniacca, bo tam mahčymaści abmiežavanyja. Možna zapisać niejkija dumki, a bolš ničoha. Inšym razam mnie chočacca vykazać niejkuju emocyju mienavita ŭ malunku».
Što budzie dalej z pratestami studentaŭ
Dla Natalli Dulinaj sioleta ŭžo 30-y navučalny hod. Jana kaža, što raniej studenty bajalisia i ničoha padobnaha nie było. Ciapierašnija pratesty prachodziać mirna, biez parušeńnia vučebnaj dyscypliny.
«Pakul jany trymajucca, vykazvajuć svaju pazycyju, nie mianiajuć svaich pierakanańniaŭ, jany paśladoŭnyja. Mirny pratest nia staŭ ahresiŭnym ci naviaźlivym. Ja zachaplajusia imi, što jany praniklisia i aktyŭna adhuknulisia na padziei ŭ krainie. Navat na toje, što adbyłosia z Romam Bandarenkam, i stvaryli svoj memaryjał. Studenty pavodziać siabie pa-hramadziansku, ja imi hanarusia».
Natalla Dulina pakul zastajecca biespracoŭnaj, ale kaža, što budzie vyrašać pytańni z pracaj, «nie čapajučy dziaržaŭnych struktur».
