Maskoŭskaja drukarnia skasavała damovu z «Narodnaj volaj» paśla kanfiskacyi nakładu. Astatnija taksama admaŭlajucca
Vałanciory razhružajuć pryviezieny z Maskvy tyraž haziety. Fota pradastaŭlena supracoŭnikami «Narodnaj voli»
Hetaja historyja pačałasia ŭ kancy žniŭnia, kali «Narodnuju volu», «BiełHazietu», «Kamsamolskuju praŭdu ŭ Biełarusi» i «Svobodnyje novosti plus» pierastaŭ drukavać dziaržaŭny «Biełaruski dom druku», spasyłajučysia na pałomku abstalavańnia. Z tych časoŭ novyja numary «Narodnaj voli» drukavalisia ŭ Maskvie i mieli doŭhi šlach da Minska. Dastaŭlać hazietu čytačam dapamahali vałanciory, bo «Biełpošta» i «Biełsajuzdruk» admaŭlajucca raspaŭsiudžvać jaje pa padpiscy i ŭ roźnicu, piša Tut.by.
Numar za 13 listapada, niahledziačy na ŭsie namahańni, da čytačoŭ nie trapiŭ. Jak tolki kurjer pryvioz partyju haziet, la ofisa redakcyi źjavilisia nieviadomyja. Paźniej u ofis pryjšoŭ AMAP, nakład haziety byŭ kanfiskavany, a kiroŭca, jaki jaho dastaviŭ —zatrymany. Jakija da vydańnia paŭstali pytańni i na jakoj padstavie była aryštavanaja abo kanfiskavanaja partyja haziet, supracoŭniki vydańnia nie viedajuć dahetul.
Paźniej vyśvietliłasia, što kiroŭcu, jakoha zatrymali razam z hazietami, adpuścili, ale jaho mašyna razam z nakładam «Narodnaj voli» i inšym hruzam zastalisia ŭ Leninskim RUUS. Kab vyśvietlić, chto byli tyja ludzi, jakija prychodzili ŭ redakcyju i na jakoj padstavie jany zabrali nakład, vydańnie źviarnułasia z aficyjnym listom va ŭpraŭleńnie Śledčaha kamiteta pa horadzie Minsku.
Pakul redakcyja raźbirałasia z kanfiskavanym nakładam, stała viadoma, što maskoŭskaja drukarnia, jakaja drukavała apošnija numary haziety, skasavała damovu pradastaŭleńnia pasłuh «Narodnaj voli». Bolš za toje, da drukarni paŭstali pytańni ŭ Rasspažyŭnahladu — jon prypyniŭ dziejnaść drukarni na 20 dzion, paviedamiŭ hałoŭny redaktar haziety «Narodnaja vola» Iosif Siaredzič.
Jašče try maskoŭskija drukarni admovilisia supracoŭničać ź biełaruskim vydańniem — «bajacca stracić biznes», kaža mieniedžar pa rekłamie «Narodnaj volaj» Anastasija Šarkievič.
— Mnohija našy čytačy i padpisčyki — heta ludzi, starejšyja za 60 hadoŭ. My im asabista dastaŭlajem haziety. Jany kažuć, što dla ich heta pramieńčyk śviatła. Niekatoryja našy vałanciory jeduć u vioski za 200-300 km, kab dastavić piensijanieram hazietu. Ciapier jany pazbaviacca haziety, — dzielicca Anastasija Šarkievič.
