«Jak raniej užo nie budzie». Miedyki zapisali VIDEAzvarot da siłavikoŭ i čynoŭnikaŭ Biełarusi
10 listapada miedycynskija rabotniki Biełarusi apublikavali videazvarot «da supracoŭnikaŭ siłavych viedamstvaŭ i čynoŭnikaŭ usich uzroŭniaŭ».
U zvarocie jany havorać pra zvalnieńni rabotnikaŭ arhanizacyj i pradpryjemstvaŭ i adličeńni studentaŭ za ich hramadzianskuju pazicyju, «šantaž» baćkoŭ, u jakich pahražajuć zabrać dziaciej.
«Čynoŭniki i siłaviki. Nie rabicie złačynstvaŭ suprać ułasnaha naroda. Vy razumiejecie, što złačynstva, ździejśnienaje pavodle zahadu, nie źnižaje jaho ciažkaść i nie zdymaje z vas adkaznaści», — havorać miedyki ŭ zvarocie.
Taksama jany źviartajucca da supracoŭnikaŭ milicyi, MNS i vajskoŭcaŭ:
«Vy nie možacie nie bačyć, što vaša forma siońnia pakrytaja hańbaj, a ŭsialaki davier naroda da vas stračany. Vy nie možacie nie zaŭvažać, ź jakoj pahardaj ludzi hladziać vam uśled. Vy dastatkova razumnyja, kab zrazumieć i pryniać toj fakt, što, jak raniej užo nie budzie», — havorycca ŭ zvarocie.
Miedyki padkreślivajuć, što ŭsie złačynstvy, ździejśnienyja siłavikami, nie zastanucca biespakaranymi. Kažuć, što nie źviartajucca da ich sumleńnia, honaru i pačućcia abaviazku, bo «ich adsutnaść vy dakazali svaimi ŭčynkami», ale zaklikajuć «vyklučna da instynktu samazachavańnia».
Jany zaklikajuć:
— spynić usialaki hvałt i represii i admianić pryniatyja raniej represiŭnyja rašeńni,
— vyzvalić palitviaźniaŭ, pryciahnuć da adkaznaści ŭsich vinavatych u źbićci i katavańniach, niezakonnych zvalnieńniach i adličeńniach, falsifikacyi vybaraŭ,
— pravieści novyja prezidenckija vybary pa ŭsich mižnarodnych standartach.