Ministr Linkiavičus pra Cichanoŭskuju: Jana pieražyła vialiki šok i ŭzrušeńnie
Ministr zamiežnych spraŭ Litvy Linas Linkiavičus 13 žniŭnia raspavioŭ pra tuju noč, u jakuju Śviatłana Cichanoŭskaja pryjechała ŭ Litvu. Pa słovach ministra, dapamoha kandydatu ŭ prezidenty Biełarusi była akazana, bo žančynie pahražała niebiaśpieka, piša Delfi.lt
Ministr nahadaŭ, što Cichanoŭskaja pryjechała ŭ Litvu ŭ aŭtorak rana ranicaj, tut užo znachodzilisia jaje dzieci. «Nie było nijakaha pasiarednictva, u ich była naša viza, vydadzienaja ŭ lipieni, jana dziejničaje hod, hetym usio i skazana. Jaje dzieci ŭžo byli ŭ Litvie, tamu biełaruskija ŭłady nie pracivilisia jaje vyjezdu, navat dapamahli joj u hetym. Tak jana i apynułasia u Litvie, ale nie nočču, a pad ranicu», — skazaŭ ministr.
U Litvu Śviatłana pryjechała sa svajoj pamočnicaj i jaje dziećmi. Linkiavičus skazaŭ, što Cichanoŭskaja pieražyła vialikaje ŭzrušeńnie.
«Jana pieražyła vialikaje ŭzrušeńnie, dumaju, i cisk, moža, šantaž, ciažka hadać. Paśla 7 hadzin pad aryštam, dzie jana začytvała hety nadyktavany tekst zajavy, jaki źjaviŭsia ŭ internecie, zaklikaju nie prymać heta za čystuju manietu. Jana pieražyła surjoznaje ŭzrušeńnie, ciapier jana trochi adychodzić, ničoha asablivaha jana nie raspaviadała», - skazaŭ ministr.
Jon paŭtaryŭ, što kali sama Cichanoŭskaja zachoča pahavaryć z žurnalistami pra svaju budučyniu, jana heta zrobić.
Linkiavičus skazaŭ, što ŭ Litvie jana moža znachodzicca hod, da lipienia 2021 h.
«Kali kamuści pahražaje niebiaśpieka, my biarem adkaznaść na siabie. I naohuł u Litvie jana — hościa, u jaje jość viza. U jaje jość prava choć kožny dzień jeździć u Biełaruś, ale heta ja kažu tearetyčna. Jaje status — hościa, jana lehalna znachodzicca ŭ Litvie. Kali niešta źmienicca ŭ jaje płanach, ci źmienicca status, heta stanie viadoma paźniej», - skazaŭ ministr.
«Što budzie dalej, pakažuć abstaviny», — praciahnuŭ jon.
«Jana nie adzinaja i nie pieršaja, chto mieŭ patrebu ŭ dapamozie z-za pahrozy jaje biaśpieki. Heta nie źjaŭlajecca ŭmiašalnictvam u spravy inšaj krainy, heta dapamoha čałavieku, jaki znachodzicca ŭ niebiaśpiecy. Što da palityčnaj dziejnaści, inšaj dziejnaści, dyk heta jaje rašeńnie», — skazaŭ ministr.
