Prafsajuz «Hrodna Azota»: My nakiravali list u CVK z patrabavańniem admieny vyniku vybaraŭ
U Hrodnie masava raspaŭjudžvajecca infarmacyja pra zabastoŭku na horadaŭtvaralnym «Hrodna Azocie».
Pres-słužba i adździeł ideałohii zavoda sutki nie vychodzili na suviaź z karespandentam Našaj Nivy, admaŭlalisia kamientavać hetyja čutski, spasyłajučysia na zaniataść i nie zdymajučy słuchaŭku.
Siońnia, kali pačała raspaŭsiudžvacca infarmacyja pra toje, što niekalki cechaŭ pradpryjemstva spynili svaju pracu, z nami na suviaź vyjšła pres-słužba «Hrodna Azota»: «Praca idzie ŭ štatnym režymie. Nie varta vieryć telehram-kanałam. Kali b naša pradpryjemstva spyniła pracu, tut adbyłasia b technahiennaja katatstrofa. Horad by vybuchnuŭ».
Toje, što bastavać «Hrodna Azotu» niebiaśpiečna, skazaŭ i Andrej Chanievič, staršynia arhanizacyi Biełaruskaha niezaležnaha prafsajuzu AAT «Hrodna Azot», jaki 10 žniŭnia nakiravaŭ zajavu ŭ CVK z prośbaj pierahledzieć vyniki vybaraŭ. Jaje padtrymaŭ aktyŭ z 20 čałaviek.
«Kali spynić tut vytvorčaść, heta niebiaśpiečna dla horada i krainy. My nie vorahi sami sabie. Na moj pohlad, na pradpryjemstvie bolš za 90 adsotkaŭ rabotnikaŭ niazhodnyja z vynikami vybaraŭ, jany hałasavali nie tolki za Śviatłanu, ale i za inšych kandydataŭ, ale nie za dziejsnaha kiraŭnika krainy».
