Žurnalistu Źmitru Kazakieviču prysudzili 10 sutak za aśviatleńnie pratestaŭ u Viciebsku
Razam ź videaapierataram Viačasłavam Łazaravym žurnalist trapiŭ u izalatar časovaha ŭtrymańnia 9-ha žniŭnia, piša baj.by
Ich zatrymali padčas zdymak na płoščy Pieramohi ŭ Viciebsku, dzie AMAP chapaŭ minakoŭ, jakija padavalisia milicyjantam vierahodnymi ŭdzielnikami masavych nieparadkaŭ. Źmitra Kazakieviča i Viačasłava Łazarava taksama zapchnuli ŭ aŭtazak, chacia jany tłumačyli, što nie ŭdzielničajuć u akcyjach pratestu, a prosta robiać svaju pracu.
Viačasłava Łazarava adpuścili z-pad varty praz 8 hadzin — paśla taho, jak źniaty materyjał byŭ źniščany. Źmitra Kazakieviča pakinuli pad vartaj, što było niečakanym, kaža Łazaraŭ:
— Milicyjanty nas paznali adrazu, bo my časta pracujem u horadzie. Vierahodna, Źmicier padaŭsia im bolš niebiaśpiečnym, bo zaŭždy razmaŭlaje pa-biełarusku, i jaho časta bačać na svaich ekranach hledačy «Biełsata».
Asudzili Źmitra Kazakieviča tolki na druhi dzień utrymańnia pad vartaj. Jon trapiŭ tudy ŭ lohkaj vopratcy, bo 9-ha žniŭnia było horača. Ciapier ža ŭ IČU zabaroniena prymać pieradačy: načalnik ustanovy zajaviŭ, što tam «asobaje stanovišča», i ŭ svajakoŭ aryštavanych nie biaruć ni ciopłaje adzieńnie, ni srodki hihijeny, ni pradukty charčavańnia.
Tolki leki ŭdałosia pieradać jašče adnamu viciebskamu niezaležnamu žurnalistu Iharu Maćviejevu. Maćviejeva taksama zatrymali 9-ha žniŭnia, kali jon fatahrafavaŭ padziei na viciebskich vulicach. Jaho nie asudzili dahetul, chacia trymajuć za kratami ŭžo bolš za dvoje sutak. Najvierahodniej, sud nad im adbudziecca 12-ha žniŭnia.
