Piotr Kuźniacoŭ: Narod prajhraŭ vulicu, ale…
Uklučeńnie internetu — vidavočnaja prykmieta taho, što ŭłada paličyła, što hałoŭnaja niebiaśpieka zzadu i treba viartacca, nakolki heta možna, u «narmalnaje» žyćcio, piša zasnavalnik homielskich «Mocnych navinaŭ» Piatro Kuźniacoŭ.
Pakolki siońnia z absalutnaj upeŭnienaściu možna skazać, što kraina ŭstupiła ŭ pałasu niestabilnaści, možna padvieści vyklučna papiarednija vyniki.
Narod prajhraŭ vulicu. Heta, chutčej za ŭsio, pakul. Časova. Ale na dadzienym etapie — prajhraŭ, bo Łukašenka zastajecca realnym kiraŭnikom.
Ułada prajhrała značna bolš.
1. Ułada prajhrała vybary. Łukašenka pa fakcie bolš nie źjaŭlajecca prezidentam bolšaści.
2. Ułada prajhrała ŭnutranuju lehitymnaść. Utrymaŭšysia na štykach, jana bolš nie zmoža adčuvać siabie kamfortna. Tut havorka nie pra Łukašenku jak takoha, a pra sistemu. Z kim by ja ni havaryŭ siońnia z tych, chto pracuje ŭ dziaržarhanizacyjach, ni ŭ kaho niama radasnaha nastroju. Usie kažuć adno: «Nas ža ciapier usie nienavidziać». Z hetym daviadziecca žyć.
3. Ułada prajhrała źniešniuju lehitymnaść. Jaje daŭno nie isnavała de-jure, ale jana była de-fakta. U płoskaści de-fakta zaraz usio stanovicca drenna: nivodnaja kraina, kiraŭnictva jakoj u zdarovym rozumie, nie stanie vybudoŭvać doŭhaterminovyja adnosiny ź dziaržavaj, ułada ŭ jakoj trymajecca vyklučna na siłavikach i moža ŭ luby momant źmianicca.
4. Ułada prajhrała infarmacyjnuju i imidžavuju vajnu. Projhryš vybaraŭ i nastupnyja bajavyja dziejańni suprać pieršapačatkova mirnych demanstrantaŭ nie pakidajuć kamienia na kamieni ad reštkaŭ reśpiektabielnaści.
5. Ułada prajhrała simvaličny kapitał. Praktyčna ŭsie značnyja dla hetaj krainy sielebryci i lidary mierkavańniaŭ adviarnulisia ad jaje. Navat kali ciapier chtości pačnie viartacca, a ŭłada praviadzie dla ich «amnistyju», parvanuju viaroŭku jak ni viažy, usio adno vuzieł budzie.
6. Ułada prajhrała ŭstojlivaść sistemy. Ja pra toje, što joj ciapier treba abo supakoicca, abo pieravieści svaju pracu praktyčna na vajennyja rejki na pastajannaj asnovie. Kab zmahacca z cełym narodam, treba pieratvaryć krainu ŭ sapraŭdny łahier. U krainie niama stolki turmaŭ i vykanaŭcaŭ, kab fizična paśpiavać i spraŭlacca ź inšadumstvam u takich maštabach. Pierabudavać tak usiu sistemu siońnia praktyčna niemahčyma praz sukupnaść papiarednich punktaŭ.
Hetaja baraćba — doŭhaja, na znos. U karotkim pramiežku času ŭ dziaržavy zaŭsiody bolš šancaŭ, dziakujučy dyscyplinie i arhanizacyi.
U doŭhaj pierśpiektyvie pieramahaje zaŭsiody narod. Tamu što i dyscyplinu, i arhanizacyju točać tysiačy faktaraŭ. A narod, u adroźnieńnie ad kankretnych ludziej, nikudy nie dzieniecca.
Kali tolki ŭ emihracyju ŭsioj krainaj nie źjedzie.
