Pravaabaroncy papiaredžvajuć: Cichanoŭskaja i Kanapackaja nie zmohuć zdać častku podpisaŭ
Kaardynatar kampanii «Pravaabaroncy za svabodnyja vybary» Uładzimir Łabkovič apublikavaŭ artykuł «Jak sabrać 7 miljonaŭ podpisaŭ i navat nie zdać ich u vybarčyja kamisii?». Jon raskazvaje pra novaŭviadzieńni ŭ zakanadaŭstvie, jakija ŭdarać pa pierśpiektyvach alternatyŭnych kandydatach. «Naša Niva» ścisła pierakazvaje jaho razvahi.
Hanna Kanapackaja, fota Nadziei Bužan
Padčas vybaraŭ u Biełarusi pracuje kala 150 terytaryjalnych kamisij — u kožnym sa 118 rajonaŭ krainy, u kožnym z 24 rajonaŭ abłasnych centraŭ i Minska, a taksama ŭ 4 haradach abłasnoha padparadkavańnia.
Raniej (da 2013 hoda) kožny zborščyk sam zdavaŭ arkušy z podpisami ŭ svaju terytaryjalnuju kamisiju. Paśla zakanadaŭstva źmianili, i ŭ Vybarčym kodeksie źjavilisia tak zvanyja «kaardynatary». Vybary-2015 adbyvalisia pa novych praviłach, ale taja elektaralnaja kampanija nikoha nie cikaviła.
Dyk voś, pretendent u prezidenty, padajučy ŭ CVK dakumienty, ukazvaje imiony kaardynataraŭ pa rajonach. Hetyja ludzi i pavinny zanieści podpisy na pravierku ŭ svaje terytaryjalnyja kamisii. «U vyklučnych vypadkach» zamiest ich heta moža zrabić sam pretendent albo kiraŭnik inicyjatyŭnaj hrupy.
Alternatyŭnyja kandydaty, nie majučy dośviedu ŭdziełu ŭ vybarach, ukazali nievialikuju kolkaść kaardynataraŭ.
Naprykład, u inicyjatyŭnych hrupach:
- Viktara Babaryki — 77 kaardynataraŭ,
- Valeryja Cepkały — 67 kaardynataraŭ
- Śviatłany Cichanoŭskaj — 18 kaardynataraŭ
- Hanny Kanapackaj — 12 kaardynataraŭ
Raźbiarem situacyju na prykładzie Cichanoŭskaj. U jaje kamandzie tolki 18 kaardynataraŭ, častka ź jakich da taho ž aryštavanaja. Za kratami i sam Siarhiej Cichanoŭski, paznačany jak kiraŭnik inicyjatyŭnaj hrupy.
Heta značycca, kab padać usie sabranyja podpisy, Śviatłana Cichanoŭskaja musić sama abjechać minimum 128 terytaryjalnych kamisij pa ŭsioj krainie. Albo vykinuć častku podpisaŭ u śmietnicu.
Hanna Kanapackaja i jaje siastra Darja Truchanovič (kiraŭnica štaba) musiać abjechać pa 67 kamisij, nie zakrytych kaardynatarami.
«Kamanda moža sabrać podpisy choć usich paŭnahadovych hramadzian Biełarusi i nie mieć mahčymaść zdać ich u kamisiju, bo nie maje kaardynataraŭ, a kiraŭnik hrupy i pretendent fizična nie mohuć paśpieć abjechać usiu Biełaruś», — padsumoŭvaje Uładź Łabkovič.
