Suśvietny bank vydzieliŭ Biełarusi 90 miljonaŭ jeŭra na baraćbu z COVID-19
Fota Nadziei Bužan
Suśvietny bank zaćvierdziŭ vydzialeńnie dla Biełarusi pakieta finansavaj dapamohi na 90 młn jeŭra dla ŭmacavańnia nacyjanalnaj sistemy achovy zdaroŭja na fonie pandemii COVID-19, paviedamiła pres-słužba pradstaŭnictva SB u Biełarusi, piša Interfaks.
«Hety prajekt dapamoža vyratavać žyćci biełarusaŭ za košt zabieśpiačeńnia sistemy achovy zdaroŭja nieabchodnym abstalavańniem», — zajaviŭ kiraŭnik pradstaŭnictva SB u Biełarusi Alaksandr Kremier.
Pry hetym jon padkreśliŭ, što «prajekt pryniasie maksimalnyja vyniki ŭ spałučeńni ź mierami sacyjalnaha dystancyjavańnia, uklučajučy pieranos masavych mierapryjemstvaŭ, skaračeńnie fizičnaj prysutnaści na pracoŭnym miescy i ŭ navučalnych ustanovach, a taksama abmiežavańnie nieabaviazkovych pierasoŭvańniaŭ ludziej». «Usie hetyja miery dapamohuć źnizić śmiarotnaść i źmiakčyć ekanamičnyja nastupstvy ŭ doŭhaterminovaj pierśpiektyvie. Čym raniej my ich realizujem, tym lepšymi buduć vyniki ŭ vyratavańni čałaviečych žyćciaŭ i zachavańni srodkaŭ da isnavańnia», — dadaŭ Kremier.
U paviedamleńni adznačajecca, što srodki SB dapamohuć zadavolić nieadkładnyja patreby sistemy achovy zdaroŭja ŭ miedycynskim abstalavańni, vyrabach miedycynskaha pryznačeńnia i navučańni piersanału dla viadzieńnia vypadkaŭ infiekcyi COVID-19 ciažkaj stupieni, u tym liku z dapamohaj zabieśpiačeńnia sučasnymi aparatami ŠVŁ, abiazbolvajučymi srodkami i antybijotykami, a taksama srodkami indyvidualnaj abarony dla rabotnikaŭ arhanizacyj achovy zdaroŭja.
