Matolka suprać Dźmitryjeva: Hety niedapalityk stvaryŭ štuk piać chajpovych pietycyj. Kudy pojduć podpisy?
Hramadski aktyvist i fatohraf Anton Matolka apublikavaŭ u fejsbuku emacyjny dopis pra dziejnaść apazicyjnych palitykaŭ.
«Adzin niedapalityk za apošni čas zrabiŭ štuk piać «chajpovych» pietycyj, tolki čamuści nie praz petitions.by (aŭtamatyzavany servis dla zboru podpisaŭ pad kalektyŭnymi zvarotami — «NN»), a praz huhłformy (servis karparacyi Google dla pracy z dakumientami i bazami danych — «NN»). I za hety čas, miarkujučy pa ŭsim, sabraŭ niekalki dziasiatkaŭ tysiač asabistych dadzienych — proźvišča, imia, adrasy prapiski/pražyvańnia ludziej, ich mejł. Apošniaja — pra «adnaŭleńnie zvolnienaha viciebskaha doktara», — piša Matolka.
Hladzi taksama: Paśla intervju Tut.by zvolnili hałoŭnaha doktara Viciebskaj balnicy chutkaj dapamohi
Niaciažka zrazumieć, što havorka viadziecca pra kiraŭnika kampanii «Havary praŭdu» Andreja Dźmitryjeva.
«Jak hetyja asabistyja danyja buduć vykarystoŭvacca — u mianie jość zdahadka. Ale vy i sami zdahadvajeciesia, dumaju, užo.
Cikava toje, što ŭsie formy dla zboru asabistaj infarmacyi byli zroblenyja na chvali rezanansnych navin, kali ludzi na emocyjach hatovyja zapaŭniać što zaŭhodna, žadajučy ščyra źmianić situacyju. A kali daviedvalisia, što heta hety niedapalityk, dy jašče i ź niedapalityčnaha ruchu — škadavali i chacieli niejak «zabrać svaje asabistyja danyja». Tolki ŭžo pozna było», — praciahvaje Matolka.
Andrej Dźmitryjeŭ. Fota svaboda.org.
«NN» spytała Andreja Dźmitryjeva, što jon dumaje nakont hetych abvinavačvańniaŭ. I ci źbirajecca vykarystoŭvać hetyja danyja dla taho, kab adnieści źviestki ŭ CVK dla rehistracyi kandydata ad «Havary praŭdu» na prezidenckich vybarach.
«U Antona heta asabistaje da nas [«Havary praŭdu» — «NN»] i da apazicyi ŭ cełym. Abvostranaja reŭnaść robić čałavieka naziralnym. My servisam petitions.by taksama karystajemsia.
Sam raźmiaściŭ tam nie adnu pietycyju. Huhł-forma dazvalaje bolš hnutkija nałady. Naprykład, kali ludzi chočuć jašče niejak dapamahčy, my dajom spasyłku na formu ŭstupleńnia ŭ kamandu. Da nas tak pryjšli dziasiatki ludziej u marafon davieru #biezkarony, jaki my pravodzim, dapamahajučy hramadstvu i daktaram va ŭmovach epidemii», — adkazvaje Dźmitryjeŭ.
«Dla CVK heta ŭsio nie pasuje, bo tam niama pašpartnych danych. Podpisy budziem padavać u Saŭmin i Ministerstva achovy zdaroŭja, jak i było paznačana. Źbirajem tolki takija danyja, kab było vidać, što heta sapraŭdnyja ludzi», — adznačaje Andrej Dźmitryjeŭ.
