Dvoje siabroŭ «Narodnaj hramady» pisali danosy ŭ KDB. Chto jany i jak tłumačać situacyju?
Siarod uzłamanaj bazy zvarotaŭ u KDB znajšlisia dvoje zvarotaŭ ad ludziej z «Narodnaj hramady», jakuju raniej uznačalvaŭ Mikałaj Statkievič. Hetyja danosy na Mikałaja Aŭtuchoviča i Eduarda Palčysa, jakija ciapier za kratami. Zapytalisia ŭ tych, čyimi imionami padpisanyja zvaroty, što adbyłosia.
Pavieł Bialucin i Volha Ciškievič. Fota: Youtube-kanała FreeInfoBel, Facebook-staronka Volhi Ciškievič
Pavieł Bialucin, imiem jakoha padpisany zvarot datyčna Mikałaja Aŭtuchoviča, navodzić tumanu. Davać kamientary praź internet jon admaŭlajecca. Kaža tolki, što «kali dać sapraŭdnuju infu, to ŭsio pierahorniecca».
U danosie, padpisanym Bialucinym, napisana, što Mikoła Aŭtuchovič «rychtuje i pačynaje ździajśniać uzbrojeny zachop ułady ŭ Biełarusi».
Adznačym, što sama źlitaja baza zvarotaŭ u KDB sapraŭdnaja. Hetamu jość roznyja paćvierdžańni. «Naša Niva» źviazvałasia ź niekatorymi danosčykami (voś i voś), jakija pisali ŭ KDB, i čyje danyja byli ŭ bazie.
Pavieł Bialucin. Skrynšot z Youtube-kanału FreeInfoBel
Źviestki, jakija možna atrymać sa źlitych bazaŭ biełarusaŭ pa tych danych, jakija pakidali pad zvarotam, całkam supadajuć sa źviestkami Paŭła Bialucina z «Narodnaj hramady».
U intervju kanału FreeInfoBel mužčyna raspaviadaŭ pra svoj adjezd ź Biełarusi. Pieršy raz jaho sudzili za «abrazu pradstaŭnika ŭłady» i dali dva hady «chatniaj chimii» (jaho sapraŭdy sudzili pa hetym artykule). Dalej na Paŭła, pa jaho słovach, zaviali kryminalnuju spravu za «hvałt abo pahrozu hvałtu da pradstaŭnika ŭłady», ale jon uciok.
Paŭłu Bialucinu 46 hadoŭ. Jon minčuk. Pra jahony publičny aktyvizm da 2020-ha ničoha nieviadoma. Pavieł maje IP, śfieraj dziejnaści jakoha paznačany «roźničny handal na rynkach».
Pasprabavali my ŭziać kamientar i ŭ Volhi Ciškievič. Jana pračytała paviedamleńnie ŭ fejsbuku, ale nie adkazała. U kamientarach inšym miedyja Volha admaŭlaje toje, što pisała danos na Eduarda Palčysa: nibyta jana davała kampjutar «susiedu-jabaćku», jaki moh napisać danosy (nieviadoma, praŭda, adkul jon viedaŭ jaje mejł i telefonny numar i ŭ čym sutnaść hetaj historyi). U zvarocie, padpisanym jaje imiem, napisana nastupnaje:
Volha Ciškievič. Fota ź jaje fejsbuku
«U Mahilovie 29 listapada budzie prachodzić tok-šou z Eduardam Palčysam, jakoha asudzili za raspalvańnie varožaści. Šou nakiravanaje suprać Sajuznaj dziaržavy i supracoŭnictva z Rasijskaj Fiederacyjaj, nosić varožy charaktar. Prašu vas pryniać miery. Z pavahaj, hramadzianka RB, Volha».
Źviestki, jakija pakinuli pad zvarotam u KDB, supadajuć sa źviestkami toj samaj Volhi Ciškievič z «Narodnaj hramady».
Zhodna z bazaj dyleraŭ sietkavaha markietynhu NL, hety numar telefona na 2018-y hod, kali byŭ zrobleny zvarot u KDB, naležaŭ joj, jak i e-mail, pakinuty pad zvarotam.
Jość i jašče adzin dokaz — u źliŭnych kanałach siłavikoŭ telehram-akaŭnt, pryviazany da numara, prypisvaŭsia Volzie Ciškievič.
Volzie Ciškievič 42 hady. Jana rodam z Mahilova. Doŭhi čas uznačalvała mahiloŭskaje adździaleńnie partyi «Narodnaje hramada», jakoj kiravaŭ Mikałaj Statkievič. Volha siabravała z byłym aktyvistam adyjoznaha NOD («Narodna-vyzvalenčy ruch») Alaksiejem Hałavinym. Prasłaviŭsia jon tym, što prychodziŭ na akcyi, jakija arhanizoŭvaŭ Statkievič, i na ŭsie zakliki kryčaŭ «pajšli na…».
Kali mierkavać pa jaje fejsbuk-staroncy, Volha vyjechała ź Biełarusi ŭ červieni 2022-ha, da hetaha žyła ŭ Biełarusi, ale mieła i dva rasijskija telefonnyja numary (z adnaho ź ich, naprykład, jana ŭ červieni 2021-ha rabiła sabie kartku kramy «Ašan»).
Moža, Pavieł i Volha nie stukačy, a niechta ich padstaviŭ dy padpisaŭsia ich źviestkami? Ale tady dziŭna, što jany aboje nie chočuć ničoha ŭciamna tłumačyć publična.
Vykanaŭca abaviazkaŭ staršyni «Narodnaj hramady» Jaŭhien Vilski raskazaŭ «Našaj Nivie», što ŭ partyi «ŭsio dobra»:
Jaŭhien Vilski. Fota «Radyjo Racyja»
«My pravodzim vybarčuju kampaniju pad pieršym numaram. Pa pieršych zaŭždy i bjuć. Pra astatnija kamandy cicha, ale heta nie kaža, što ŭ ich niama čystak. Pabačym pa śpisach.
Kali raźbiaromsia, što adbyłosia, to damo vynik. Dedłajnaŭ my nie stavim».
U sacsietkach partyi napisana, što siabroŭstva fihurantaŭ skandału prypynienaje, vyklučanyja jany i sa śpisaŭ na vybary ŭ Kaardynacyjnuju radu.
«Naša Niva» — bastyjon biełaruščyny
PADTRYMAĆČytajcie taksama:
Apublikavali śpisy kandydataŭ u novy skład Kaardynacyjnaj rady
Ściapana Łatypava zdaŭ KDB jahony rasijski kaleha-arbaryst. Ale sam sprabuje admaŭlać heta
«Narodnaja hramada» adreahavała na apubličvańnie danosčykaŭ u šerahach partyi
