Dva novyja vydańni: historyja Połacka ad šviejcarskaha historyka i niečakany Kupała ad Hanny Sieviaryniec
Kniha šviejcarskaha daśledčyka Štefana Rodevalda «Pra Połackuju Vieniecyju. Kalektyŭnyja dziejańni sacyjalnych hrup horada pamiž Uschodniaj i Centralnaj Jeŭropaj (Siaredniaviečča, rańni Novy čas, XIX st. — da 1914 h.)» u sieryi biblijateki časopisa «Biełaruski histaryčny ahlad». Vyjšła daśledavańnie viadomaha šviejcarskaha historyka, pryśviečanaje tysiačahadovaj historyi Połacka, jakaja razhladajecca ŭ šyrokim kantekście Centralna-Uschodniaj Jeŭropy. U centry jaho ŭvahi formy sacyjalnaj arhanizacyi i kalektyŭnych dziejańniaŭ žycharoŭ šmatetničnaha i polikanfiesijnaha horada, pieraŭtvareńni i źjavy doŭhaha tryvańnia ŭ žyćci połackaha hramadstva ŭ roznyja epochi i pieryjady jaho minułaha. Navukovy redaktar knihi — Hienadź Sahanovič.
Kniha vybranych tvoraŭ Janki Kupały maje na mecie pradstavić čytaču niečakanaha kłasika ŭ sučasnym pračytańni. Vydańnie dapoŭniena litaraturaznaŭčymi kamientarami da kožnaha tvora, karotkim letapisam žyćcia i tvorčaści, miemuarnymi śviedčańniami, nieviadomymi krytyčnymi artykułami. U knizie pradstaŭlenyja i prakamientavanyja 37 vieršaŭ, 3 paemy («Bandaroŭna», «Kurhan», «Bieznazoŭnaje») i 2 dramy («Raskidanaje hniazdo», «Tutejšyja»).
«Niama ničoha bolš kanstruktyŭnaha ŭ spaścižeńni rodnaj litaratury, čym uziać i admovicca ad papiaredniaha kanona, pastavić tradycyju i chrestamatyju dahary nahami, rašuča admovicca ad sastarełych dohmaŭ — i pahladzieć na kłasičnyja teksty vačyma sučaśnikaŭ. Jak jany tady ažyvajuć, jakim novym sensam adkryvajucca, jak ščyra radujucca śviežamu vietru i maładomu pračytańniu — lubata!..» (Hanna Sieviaryniec.)
Układalnik Hanna Sieviaryniec. Kniha vyjšła ŭ sieryi «Naš sučaśnik».
Abiedźvie knihi možna kupić u internet-kniharni kniganosha.by.
