Epidemija ŭ Bielhii nabyła maštab katastrofy: bolš za 3000 achviar u krainie z nasielnictvam jak Biełaruś
Małaja kraina, u jakoj raźmieščanyja orhany kiravańnia Jeŭrasajuza, maje adnu z najhoršych u śviecie situacyj z karanavirusam.
10 krasavika kolkaść pamierłych ad COVID-19 u Bielhii pieravysiła 3019, paviedamiła sanitarnaja słužba karaleŭstva. Asabliva šmat achviar — u damach sastarełych.
Pacyjenty z karanavirusam zajmajuć na siońnia 5610 łožkaŭ u bielhijskich špitalach, u tym liku 1278 miescaŭ u reanimacyi. 993 pacyjenty ŭ krainie lažać na štučnaj vientylacyi lohkich.
Kolkaść špitalizavanych za apošnija 24 hadziny pieravysiła kolkaść vypisanych na 20 čałaviek. Ale ŭčora byŭ pieršy dzień, kali ličba pacyjentaŭ u reanimacyi źniziłasia na 7 čałaviek, što daje šancy na toje, što pierałom budzie blizka.
Bielhija adnosna pozna ŭviała karancinnyja abmiežavańni. Situacyja ŭ hetaj krainie našmat horšaja, čym u suvymiernych ź joj Aŭstryi, Šviejcaryi, Čechii ci Partuhalii, jakija taksama susiedničajuć ź vialikimi ačahami pandemii ŭ Jeŭropie, jakija ŭtvarylisia ŭ Italii, Ispanii i Francyi.
