Aficyjnaja statystyka: u Biełarusi 440 vypadkaŭ karanavirusa. Rost na 25% za dzień
Ministerstva achovy zdaroŭja apublikavała čarhovuju aficyjnuju infarmacyju pra raspaŭsiudžvańnie karanavirusnaj infiekcyi COVID-19.
Fota Nadziei Bužan
Takim čynam, pa stanie na 4 krasavika (zvyčajna ŭkazvajucca źviestki na 8:00) było zafiksavana 440 vypadkaŭ.
- Na lačeńni znachodziacca 394 čałavieki.
- Vyzdaravieŭ 41 čałaviek.
- Pamierli 5 čałaviek.
Učora Minzdaroŭja davała ličbu 351, zaŭčora — 300. Takim čynam, rost siońnia skłaŭ 25%, učora jon składaŭ 17%. Heta prykładna adpaviadaje tempu raspaŭsiudžvańnia infiekcyi na hetym etapie epidemii ŭ inšych krainach.
Razam z tym niezrazumiełymi zastajucca niekatoryja ličby. Naprykład, raniej Minzdaroŭja paviedamlała, što vyzdaravieli (adpravilisia dachaty) i vybyli (adpravilisia ŭ morh) 46 čałaviek. Z ulikam čatyroch śmierciaŭ, aficyjna pryznanych na toj momant, atrymlivałasia, što pa stanie na 2 krasavika vyzdaravieli 42 čałavieki. Adnak pavodle novaj infarmacyi vyzdaravieŭ 41 čałaviek.