Łukašenka: U nas 11 čałaviek, padklučanych da aparataŭ ŠVŁ. Ciažkich niama
Pra heta Alaksandr Łukašenka zajaviŭ u intervju telekampanii «Mir», paviedamlaje Źviazda.
Jon raskazaŭ pra stan usich ludziej, jakija padklučany da aparataŭ štučnaj vientylacyi lohkich, takich na ranicu čaćviarha było 11 čałaviek.
«U nas kala troch tysiač aparataŭ ŠVŁ, plus narkozna-dychalnyja možna vykarystoŭvać u krajnim vypadku», — adznačyŭ Łukašenka. Pavodle jaho słoŭ, na siońniašni momant «ciažkich niama».
Sistema achovy zdaroŭja, padkreśliŭ Alaksandr Łukašenka, abaviazana źbierahčy ludziej ad niebiaśpieki.
«Daktary pavinny lačyć ludziej — heta majo žorstkaje patrabavańnie. Nie chadzić i zakryvać tam ustanovy, niešta admianiać — heta sprava ŭłady. Ty pryjdzi, dakažy, što heta treba, a ŭłada prymie rašeńnie. A ty nie adchilajsia, davaj, lačy!» — paŭtaryŭ svaju ŭstanoŭku Łukašenka.
Biełaruski lidar znoŭ uspomniŭ sumny vypadak u Viciebsku, kali na karanavirus zarazilisia bolš za 10 daktaroŭ.
«Jak hruba kažu, «u pižamach» brali hetyja testy. Kažuć: karanavirus. Nie važna, što. Ty ž doktar, chacia b masku nadzień ŭ taki momant, nu reśpiratar nadzień. Jość ža hetyja kaściumy, bachiły, palčatki, akulary — nadzień heta», — apisaŭ pryčyny zaražeńnia viciebskich uračoŭ Łukašenka.
Pry hetym jon padziakavaŭ miedykam za ich pracu i prainfarmavaŭ, što ich žyćci i zdaroŭje ŭ biaśpiecy.
«Zusim nijakaj naściarohi ŭ hetych adnosinach. Hetyja ŭsie daktary sto pracentaŭ buduć zdarovyja, ale ź inšaha boku, dobra, što jany ŭžo biez masak zmohuć pracavać. U ich imunitet vypracavaŭsia. Viadoma, jany buduć pracavać užo jak vopytnyja ludzi, z usimi mierami pieraściarohi, ale voś takija vypadki byli», — nie chavaje Alaksandr Łukašenka.
Mienavita tamu tudy byŭ nakiravany ministr achovy zdaroŭja sa śpiecyjalistami, a staršyni abłvykankama zahadana dapamahać im. Heta dazvoliła ciaham troch dzion uziać situacyju pad kantrol, kaža Łukašenka.
«Užo siońnia na 100 čałaviek kolkaść ahulnych zachvorvańniaŭ u Viciebskaj vobłaści źniziłasia, — arhumientavaŭ Alaksandr Łukašenka. — Ja kažu, što malu Boha, kab my jak zaraz (u takim ža stanie) prajšli da Vialikadnia chacia b, hetaje płato, jak daktary kažuć, pik hety, i daj Boh, kab udałosia źnizić».
