Zamiežny student abrabavaŭ svajho ziemlaka, jaki chacieŭ kupić kvateru ŭ Minsku
Zamiežny student, jaki prachodzić navučańnie ŭ Minsku, vykraŭ u svajho znajomaha ziemlaka bolš za 74 tysiačy dalaraŭ, piša «Minsk-Naviny».
31 śniežnia 2019 hoda ŭ milicyju z zajavaj źviarnuŭsia 20-hadovy zamiežny student, jaki paviedamiŭ, što ŭ jaho vykrali bujnuju sumu. Vyśvietliłasia, što napiaredadni jon paprasiŭ dapamahčy nabyć kvateru ŭ Minsku ŭ 21-hadovaha suajčyńnika. Paciarpieły niadaŭna pryjechaŭ u biełaruskuju stalicu, a jaho ziamlak žyŭ u Minsku amal dva hady.
U bank dla atrymańnia bujnoha hrašovaha pieravodu maładyja ludzi adpravilisia razam na mašynie ziemlaka. Pasažyr davieryŭsia i na zvarotnym šlachu navat pakłaŭ dla zachavańnia hrošy ŭ bardačok. Adśviatkavać atrymańnie bujnoj sumy studenty adpravilisia ŭ restaran, a paśla ŭładalnik aŭto prosta źjechaŭ z hrašyma. Kab adciahnuć znajomaha, jon paprasiŭ jaho pakłaści ježu ŭ bahažnik, a sam nacisnuŭ na piedal hazu. Paciarpieły nie moh adrazu źviarnucca ŭ milicyju — jaho ziamlak paprasiŭ mabilny telefon, kab nibyta patelefanavać, i nie viarnuŭ jaho.
Tym nie mienš rabaŭnik byŭ zatrymany supracoŭnikami milicyi. U chodzie rasśledavańnia vyjaŭleny i kanfiskavany ŭsie vykradzienyja hrošy, bolšaja častka jakich (70 tysiač dalaraŭ) znojdziena ŭ tajniku ŭ lesapałasie. Astatnija byli ŭ aŭtamabili zamiežnaha studenta.
21-hadovamu maładomu čałavieku vystavili abvinavačvańnie ŭ rabavańni, ździejśnienym u asabliva bujnym pamiery (č. 4 art. 206), i machlarstvie (č. 1 art. 209 KK). Abvinavačanaha ŭziali pad vartu, nakłali aryšt na jaho majomaść ahulnym koštam bolš za 30 tysiač rubloŭ.
