«Dzicia nie zapaminaje hetych debilnych słovaŭ». Piedahoh z-pad Klimavičaŭ zapisała aburalnaje VIDEA pra biełaruskuju movu
Ina Kardabniova žyvie ŭ ahraharadku Cimanava pad Klimavičami i pracuje instruktaram-mietadystam u dziciača-junackaj spartyŭnaj škole. Skončyła fizkulturny ŭniviersitet, udzielničaje ŭ čempijanatach krainy pa lohkaj atletycy. U sacsietkach piša, što hanarycca tym, što źjaŭlajecca nastaŭnicaj.
U volny ad škoły čas Ina zajmajecca naroščvańniem viejek.
Ale prasłaviłasia žančyna nie jak piedahoh.
Niadaŭna Ina zaviała jutub-kanał. Takich ŭ internet-prastory miljony — kaśmietyka, makijaž, padarunki na 8 sakavika… Papularnaść nie dachodziła i da 1000 prahladaŭ, usio ž kankurencyja z boku školnic vielizarnaja.
I Kardabniova znajšła vyjście. Jana vykłała abraźlivaje videa pra biełaruskuju movu. U im žančyna aburajecca, što jaje synu davodzicca vučyć u škole hety «nikomu niepatrebny pradmiet».
«Biełaruskaja mova ŭ nas nidzie nie vykarystoŭvajecca. Adzinaje vyklučeńnie, nie viedaju, dla kaho heta zrabili, napeŭna, dla niejkaha pontu, — u mietro ŭ Minsku abjaŭlajuć prypynki na biełaruskaj movie. Da čaho heta naohuł, niezrazumieła», — viaščaje błohierka.
I dadaje, što biełaruskaja patrebna tolki dla taho, kab vyvučycca na nastaŭnika biełaruskaj movy.
Praciah temy. Načalnika klimavickaj trenierki vyklikali ŭ rajvykankam. A jaje, moža, pazbaviać premii
Instruktarka ličyć, što rodnaja mova zaminaje vučyć ruskuju.
«Kali syn robić u biełaruskaj movie ruskija pamyłki, mianie heta nie pryvodzić u šalenstva, ale kali ŭ ruskaj movie hetyja kałhasnyja biełaruskija pamyłki źjaŭlajucca, voś heta mianie prosta zabivaje».
Ina kaža, što nie svarycca na syna za drennyja adznaki pa biełmovie i naohuł z radaściu b dazvoliła jamu nie vyvučać hety pradmiet.
«Ale jana ž [biełaruskaja mova], sabaka, upłyvaje na hadavyja adznaki, na atestat»,
— chvalujecca maci.
«Navošta rabić našych dziaciej jašče bolš tupymi, bo jany praź biełaruskuju nie mohuć vyvučyć ruskuju movu <…> Jana ž praciahvaje nam pudryć mazhi da 11 kłasa!» — vykazvajecca jana.
Doma Ina nie ŭžyvaje «stromnych» biełaruskich słovaŭ, tamu zrabić damašku dla dziciaci pa hetym pradmiecie — sapraŭdnaje vyprabavańnie.
«Dziciaci treba pierakazać tekst, a jon nie zapaminaje hetych debilnych słovaŭ… Ja navat nie chaču, kab jon ich vučyŭ, kab zabivaŭ svaju hałavu hetymi niepatrebnymi absalutna słovami».
Pa słovach błohierki, ad rodnaj movy tolki adny prablemy.
«Kali z hłybinki dzieci pryjazdžajuć z małpavym, kałhasnym akcentam, heta pieraškadžaje im!» — praciahvaje viaščać piedahoh, škadujučy, što ŭ jaje niama «pryhožaha maskoŭskaha akcentu», a ludziam «ciažka słuchać karavaje biełaruskaje maŭleńnie».
Biełaruskuju movu žančyna nazyvaje łamanaj ruskaj i padsumoŭvaje:
«Vielmi niepatrebnaja mova, chaj by jana hareła sinim połymiem».
Videa ŭžo nabrała 10 tysiač prahladaŭ i 4 tysiačy dyzłajkaŭ. Samy papularny kamientar (amal 800 łajkaŭ) pra toje, što Kardaniova — razumova niepaŭnavartasnaja.
«Naša Niva» źviazałasia z žančynaj. Ina raskazvaje, što daŭno chacieła zapisać taki zvarot.
— Ja prosta vykazała svajo mierkavańnie. A ŭbačyła nieadekvatnyja kamientary, ludzi stali žudasna abražać mianie, navat pahrozy stali pastupać. Napisali, što ja abražaju i radzimu, i nacyju.
— A vy nie ličycie, što abražajecie?
— Nie, kaniečnie, nie liču.
Svaju pazicyju jana ličyć abhruntavanaj:
«Nie prosta «mnie nie padabajecca» i ŭsio. Dzieciam składana biełaruskuju movu vučyć. Ni pa jakim inšym pradmiecie ja takoha nie skažu, ni pa astranomii, ni pa fizicy. Asabliva ciažka dajecca dzieciam u małych haradach. Jany i tak nie čujuć tam ruskaje maŭleńnie».
Pry hetym Ina zapeŭnivaje, što jana patryjotka.
«Jak minimum dvojčy na miesiac słuchaju himn, bo jon hučyć na adkryćci spabornictvaŭ».
