«I karovaŭ paśviŭ, i tarfu kapaŭ»: što viadoma pra novaha ministra sielskaj haspadarki i jahonuju siamju
Novym ministram sielskaj haspadarki staŭ 46-hadovy Ivan Krupko. Papiaredni ministr Anatol Chaćko nie adpracavaŭ na pasadzie i hod.
Mienavita ŭ hetym viedamstvie ministry mianiajucca čaściej, čym u lubym inšym. Za časami Łukašenki heta ŭžo dvanaccaty ministr sielskaj haspadarki (plus da ŭsiaho Michaił Rusy byŭ ministram dvojčy).
Ivan Krupko na miascovych «Dažynkach». Fota prictalica.by
Što viadoma pra Ivana Krupko? Jon naradziŭsia ŭ 1974 hodzie ŭ Burdzievičach Karelickaha rajona. Vučyŭsia ŭ Hrodzienskim sielskahaspadarčym instytucie. Paśla raźmierkavaŭsia zaatechnikam u kałhas «Śvitańnie» Niaśvižskaha rajona. Pracavaŭ na roznych kiroŭnych pasadach u Niaśvižskim rajonie. U 2010 staŭ staršynioj Niaśvižskaha rajvykankama. Letaś jaho pastavili staršynioj Minskaha rajvykankama.
Krupko — daloka nie pieršy kiraŭnik Niaśvižskaha rajona, jaki pajšoŭ na pavyšeńnie. Uładzimir Dražyn staŭ vice-premjeram, Leanid Krupiec — kiraŭnikom Minskaha abłvykankama, a Hienadź Sałaviej — Homielskaha.
Pry Ivanu Krupko skončyłasia rekanstrukcyja Niaśvižskaha zamku, chacia kažuć, što čynoŭnik nie radavaŭsia, što na jaho terytoryi znachodzicca hety pomnik. Maŭlaŭ, što ź im rabić? Sielskaja haspadarka zrazumiełaja, a jak turyzm raźvivać?
«Naša Niva» znajšła mamu ministra sielskaj haspadarki Lidziju Alaksiejeŭnu, joj chutka budzie 67 hadoŭ. Žyvie ŭ Burdzievičach (miascovyja kažuć BurdziavIčy).
«Boža ž moj, a što ja raskažu? Jon ža sam starajecca ŭsio rabić! Jak usie dzietki ros: u futboł hulaŭ, karovaŭ paśviŭ, tarfu kapaŭ, kasiŭ», — kaža Lidzija Alaksiejeŭna.
Udakładniajem: a što takoje tarfa?
«Heta palić, jak brykiet. Ciapier užo nie kapaje nichto, bo niama kamu, a raniej usie kapali. Na bałotach heta było, nožački śpiecyjalnyja byli. I arać umieje Ivan, chadziŭ za płuham. I nam araŭ, i babie našaj, kali jašče žyvaja była».
Škoła ŭ Burdzievičach była pačatkovaja, čatyry kłasy. Potym jaje zakryli, i dzieci stali chadzić u Vialikija Žuchavičy (heta za piać kiłamietrach ad Burdzievičaŭ). «Byŭ aŭtobus. Nu jak aŭtobus — traktarystaŭ vazili, to i dzieci jeździli. A nazad užo jak mahli: i pieššu, i na traktarach padvozili».
Usie karani Ivana Krupko pachodziać z Karelickaha rajona. Adtul i mama, i tata, i babuli ź dziadami. Baćka čynoŭnika pamior dvanaccać hadoŭ tamu. Na toj momant jamu było 62 hady, tolki vyjšaŭ na piensiju, jak spyniłasia serca.
«Ja chadziła rabiła na bryhadu, rabiła ŭ ciaplicy, rabiła na kurach, rabiła na cialatach. Muž moj Ivan Alaksandravič byŭ traktarystam, kambajnieram.
Tady ŭžo ja pajšła na fiermu, i jaho pieraviali na fiermu. Na kurach my byli razam. A ja rabiła jašče i ŭ Minsku! Ja tam kančała vučylišča, žyła ŭ internacie, čatyry hady na Kamvolnym kambinacie adrabiła. Potym zamuž vyjšła i ŭžo viarnułasia siudy», — raskazvaje mama čynoŭnika.
U Ivana Krupko jość siastra, jana taksama vučyłasia ŭ sielskahaspadarčym instytucie ŭ Hrodnie, a ciapier pracuje rehistrataram u balnicy ŭ Hrodzienskim rajonie. U jaje dva syny: starejšy navučajecca ŭ Instytucie hramadzianskaj abarony MNS, a małodšy jašče školnik.
Čamu Ivan Krupko pajšoŭ vučycca pa sielskahaspadarčaj linii?
«Ich tut vierbavali. Chto choča ŭ instytut, kažuć. A jon ža dzicia, boh jaho viedaje, čaho jon choča! Źbiralisia pastupać [ź siabrami] ŭtroch na inžyniera ŭ Hrodna, a potym razyšlisia, chto kudy. Jon pajechaŭ u sielskahaspadarčy instytut. Advučyŭsia piać hadoŭ i pajechaŭ rabić u Niaśviž zaatechnikam», — kaža spadarynia Lidzija.
Padčas vučoby ŭ Hrodnie Ivan Krupko znajšoŭ žonku, jana vučyłasia ŭ adnoj hrupie ź siastroj, žyli ŭ adnym pakoi. Ivan zachodziŭ da siastry, tak i paznajomiŭsia z Taćcianaj. Žonka ŭ ciapierašniaha ministra rodam ź Dziatłava.
U pary dvoje dziaciej. Starejšy syn Maksim vučyŭsia ŭ suvoraŭskim vučyliščy ŭ Minsku, a ciapier pastupiŭ na fakultet mižnarodnych adnosin BDU.
Maksim Krupko. Fota facebook.com
Dačka Palina skončyła Niaśvižskuju himnaziju, jana mastačka. Atrymała hran-pry na konkursie-plenery junych mastakoŭ imia Michaiła Sieŭruka, jaki štohod adbyvajecca ŭ Niaśvižy. Ciapier jana vučycca na dyzajniera ŭ Minsku.
Fota www.nesvizh-news.by
«Jak u Niaśvižy byŭ, to čaściej pryjazdžaŭ, a ciapier radziej, ale ž pryjazdžaje. Daj jamu Božačka zdaroŭja», — kaža pra Ivana Krupko mama.
***
Usie ministry sielskaj haspadarki za čas prezidenctva Łukašenki:
- Vasil Lavonaŭ (1994 — 1997)
- Ivan Šakoła (1997 — 1998)
- Juryj Maroz (1998 — 2000)
- Vadzim Papoŭ (lipień — listapad 2000)
- Michaił Rusy (2001 — 2003)
- Zianon Łomać (lipień — śniežań 2003)
- Vasil Dvaraninavič (2003 — 2004)
- Leanid Rusak (2004 — 2008)
- Siamion Šapira (2008 — 2010)
- Michaił Rusy (2010 — 2012)
- Leanid Zajac (21 žniŭnia 2012 — 27 sakavika 2019)
- Anatol Chaćko (2 krasavika 2019 — 16 sakavika 2020)
- Ivan Krupko (16 sakavika 2020 — da ciapierašniaha času)
