Niamieččyna zakryvaje miežy, spyniaje pravierku biletaŭ u hramadskim transparcie
Z paniadziełka 16 sakavika z 08:00 pa miascovym časie Niamieččyna zakryje miežy z Aŭstryjaj, Francyjaj i Šviejcaryjaj z pryčyny pašyreńnia karanavirusa. Pra heta paviedamlajuć niamieckija ŚMI.
Rašeńnie było pryniataje pa vynikach videakanfierencyi z udziełam kanclerki FRH Anhieły Mierkiel, ministra ŭnutranych spraŭ i premjer-ministraŭ fiederalnych ziamiel Bavaryja, Baden-Viurtembierh i Saar. Ruch tavaraŭ zastaniecca svabodny, hranicu dazvolać pierajazdžać tym ludziam, jakija pracujuć na terytoryi susiedniaj dziaržavy.
Miažu z Polščaj, nahadajem, jašče raniej zakryła Varšava.
Niamieckaja čyhunka Deutsche Bahn źmianšaje kolkaść ciahnikoŭ, u ich pierastanuć praviarać bilety — dla abarony pasažyraŭ i kanduktaraŭ.
U Niamieččynie pa stanie na siaredzinu dnia 15 sakavika vyjaŭlena amal 5500 nośbitaŭ karanavirusa. U toj ža čas kraina pakul maje adzin z najnižejšych u śviecie pracent śmiarotnaści. Ad infiekcyi tam pamierła tolki 11 čałaviek. Heta źviazvajuć z tym, što Niamieččyna praviała najbolšuju na dušu nasielnictva kolkaść testaŭ na virus. Imavierna, u hetaj krainie prosta achop vyjaŭleńnia nośbitaŭ najvyšejšy.
Usiaho na siońnia ŭ śviecie ad karanavirusa pamierła bolš za 6000 čałaviek.
