Minski paŭmarafon u 2020 hodzie stanie samym masavym u svajoj historyi
Paŭmarafon projdzie ŭ hetym hodzie 13 vieraśnia pa novym maršrucie. Jak i raniej, biehunam prapanujuć na vybar try dystancyi, a ŭsiaho na trasie płanujuć sabrać 42 000 čałaviek. Pryzavy fond sfarmuje Bank Dabrabyt jak płacinavy partnior paŭmarafona.
Limit biehunoŭ pavialičany na 2000 u paraŭnańni ź letašnim spabornictvam. Tym samym heta budzie samy masavy zabieh, jaki kali-kolviečy pravodziŭsia ŭ Biełarusi. U zaležnaści ad padrychtoŭki i žadańnia možna budzie prabiehčy 5,5, 10,55 abo 21,1 km.
Ustupnyja ŭnioski startujuć z 13 rubloŭ — u stolki abydziecca rańniaja (da 10 maja) rehistracyja na maršrut u 5,5 km. Biaspłatna prabiehčy zmohuć školniki, studenty, piensijaniery, likvidatary ČAES i ludzi z abmiežavanymi mahčymaściami. Maksimalnaja suma składzie 100 rubloŭ — heta kali zapisacca na dystancyju 21,097 km za dzień da zabiehu. U nabor udzielnika ŭvachodziać firmovaja majka, numary z elektronnym čypam i suvieniry ad sponsaraŭ.
Pieršyja try miescy na kožnaj dystancyi buduć hrašovymi. Pryzavy fond sfarmirujuć nie z unioskaŭ udzielnikaŭ, a za košt srodkaŭ Banka Dabrabyt.
Maršrut asnoŭnaha zabiehu na 21,1 km budzie startavać na praśpiekcie Pieramožcaŭ, paśla čaho zbočyć na praśpiekt Niezaležnaści i zrobić koła pad mostam pamiž budynkami BDU i Peduniversitetu. Zatym udzielniki prabiahuć ŭzdoŭž vulicy Karła Marksa, viernucca na praśpiekt la Kupałaŭskaha teatra, dabiarucca da płoščy Pieramohi, ź jakoj patrapiać na vulicu Kamunistyčnuju i praniasuccca pa darohach pobač z rakoj Śvisłač. Paśla Staražoŭskaj vulicy kałona zaviernie naleva i trapić na praśpiekt Pieramožcaŭ. Pa im paŭmarafoncy dabiarucca da «Minsk-Areny», abbiahuć jaje i nakirujucca nazad. Pa tradycyi zavieršycca zabieh kala Pałaca sportu.
