Dziaržaŭnyja ŭstanovy atakavanyja kampjutarnym virusam
Biełaruskija dziaržaŭnyja ŭstanovy sprabujuć zarazić kampjutarnym virusam.
Jakuju mienavita škodu jon nanosić, pakul nieviadoma, ale dasyłajuć jaho nastupnym čynam: na mejł arhanizacyi ci kankretnych čynoŭnikaŭ prychodzić list sa źmiestam, blizkim da śfiery raboty.
Siłavikam prychodziać «spravazdačy» ab pravaachoŭnaj dziejnaści, rabotnikam sacyjalnaj śfiery — paviedamleńni ab kolkaści nibyta chvorych na karanavirus u Biełarusi i napaminami ab biaśpiecy.
Da mejła prymacavany fajł, u jakim chavajecca virus.
Nakolki viadoma «Našaj Nivie», kampietentnyja słužby sprabujuć izalavać patencyjna zaražanyja kampjutary i vyjavić charaktar virusa.
Heta možna ličyć zvyčajnym fišynham [fišynh — rassyłka listoŭ ad imia inšych arhanizacyj i kampanij sa spasyłkaj na łžestaronku, na jakoj achviara musić uvieści svoj łahin i parol], ale ździŭlaje vybar achviar. Taksama viadoma, što škodnyja rassyłki dasyłalisia z paštovych skryń na @tut.by. Ekśpierty kažuć, što baza takich skampramietavanych adrasoŭ, siarod jakich jość i adrasy dziaržaŭnych ustanoŭ, pradajecca na chakierskich forumach.
U Minskim zanalnym centry hihijeny i epidemijałohii, z čyjho adrasa [email protected] nibyta taksama viałasia škodnaja rassyłka, stanam na ranicu paniadziełka nie mohuć patłumačyć, jakija zachady biaśpieki ŭžo pryniatyja. «Načalstva na vyjeździe, a ja tudy nie zachodžu», — kaža sakratarka, u čyje abaviazki, zdavałasia b, i ŭvachodzić rabota z elektronnaj poštaj.
Zasnavalnik TUT.by Juryj Zisier kaža, što niejkaj hłabalnaj prablemy niama.
«Kahości tam adnaho ŭzłamali, ad ich imia dasłali škodnuju spasyłku — my tut pry čym? Nijakaha masavaha ŭzłomu pošty niama», — skazaŭ jon.
U svaim kamientary TUT.by pryznaje, što adzinkavyja ŭzłomy byli zaŭsiody i nahadvaje pra masštabny ŭzłom «UKantakcie», kali złaŭmyśnikam stali viadomyja mejły karystalnikaŭ, a paroli, maŭlaŭ, časta supadajuć. «TUT.by i słužba techničnaj padtrymki TAA «Jandeks» pilna praviarajuć infarmacyju», — reziumuje sajt.
Da 2015 hoda pošta TUT.by pracavała ŭ partniorstvie z karparacyjaj Google, ale paśla amierykancy zharnuli hetuju prahramu. U vyniku TUT.by pieranios svoj paštovy servis na sierviery rasijskaha «Jandeksa».
«Nakolki ja viedaju, nivodnaje ministerstva ci viedamstva aficyjna nie zapytała AAC ci Minsuviazi ab tym, jakim paštovym servisam varta karystacca ŭ svajoj rabocie.
Tamu, kali my prosta ŭviadziem u huhle zapyt «tut.by site:gov.by», to ŭbačym, što poštaj @tut.by karystajecca proćma dziaržaŭnych struktur. A hety servis raźmiaščajecca na rasijskich siervierach i ŭsio, što šlecca z adrasoŭ @tut.by na, naprykład, @gov.by, kapijujecca ŭ Rasii i technična prosta pieradasyłajecca adrasatu, — kamientuje situacyju adzin z ekśpiertaŭ pa elektronnaj biaśpiecy, —
U vyniku ŭ FSB jość techničnaja mahčymaść čytać usiu pierapisku, jakaja adpraŭlajecca i prymajecca skryniami na @tut.by, uklučna ź ministerstvami, viedamstvami i ich rabotnikami, abo abirać tolki toje, što im patrebna. Zamiežnaja raźviedka moža navat adpraŭlać listy ad imia karystalnikaŭ pošty @tut.by — ale ŭ hetaj historyi ź virusam, vidać, inšaja situacyja, ja kažu pra mahčymaści».
«Taksama ŭ mianie pytańnie da «Biełtelekama», što ŭ ich za takaja abaronienaja placoŭka dla dziaržaŭnych orhanaŭ, što takija listy ŭvohule traplajuć u asnoŭnuju skryniu atrymalnikaŭ @gov.by, a nie absiakajucca antyvirusam?», — reziumuje ekśpiert.
Jon miarkuje, što ŭ lubym razie elektronnaja pošta ŭsich dziaržaŭnych i «kaladziaržaŭnych» struktur pavinna fizična znachodzicca na biełaruskich siervierach.
