Palijenku nie puścili na razhlad skarhi ŭ Viarchoŭny sud z-za našyŭki salidarnaści
Viarchoŭny sud Biełarusi 14 lutaha razhladzieŭ apielacyjnuju skarhu aktyvista anarchisckaha ruchu Dźmitryja Palijenki na prysud Minskaha haradskoha suda. Palijenku ŭ sud nie prapuścili z-za admysłovaj našyŭki na vopratcy, piša spring96.org.
Palijenka zrabiŭ našyŭku ŭ znak salidarnaści z anarchistam — 19-hadovym Mikitam Jemialjanavym, asudžanym dniami na siem hadoŭ kałonii.
Bok abvinavačvańnia paviedamiŭ, što vina Palijenki całkam dakazanaja i niama sumnievu ŭ pravilnaści vyniesienaha prysudu. Tamu prosić pakinuć biez zadavalnieńnia skarhu Palijenki.
Skarhu pakinuli biez zadavalnieńnia.
25 kastryčnika 2019 hoda byłoha palitviaźnia źvinavacili ŭ asabliva złosnym chulihanstvie i prysudzili 3 hady «chatniaj chimii» (abmiežavańnie voli biez nakiravańnia ŭ vypraŭlenčuju ŭstanovu) z padpiskaj ab niavyjeździe i prymusovym lačeńniem ad ałkahalizmu. Adzin hod abmiežavańnia voli byŭ adniaty zhodna z abvieščanaj amnistyjaj, taksama ŭ termin adbyćcia pakarańnia byŭ zaličany čas znachodžańnia ŭ śledčym izalatary.
Praź niekatory čas prakuratura horada Minska abskardziła rašeńnie Minskaha haradskoha suda ŭ Viarchoŭny sud, ale zatym hety pratest prakuror adklikaŭ. Dźmitryj Palijenka, u svaju čarhu, taksama abskardziŭ rašeńnie Minskaha haradskoha suda ŭ vyšejstajačym sudzie, a ŭ hetym vypadku im źjaŭlajecca Viarchoŭny sud.
Anarchistam Jemialjanavu i Komaru dali pa 7 hadoŭ kałonii ŭzmocnienaha režymu za akcyi la budynkaŭ suda i SIZA ŭ Minsku
