Navukoŭcy vyjavili «ŭniviersalny sposab» baraćby z rakam
Adkryćcio kamandy navukoŭcaŭ z Univiersiteta Kardyfa moža dazvolić miedykam «naładžvać» imunnuju sistemu čałavieka suprać rakavych kletak. Heta moža adkryć šlach da ŭniviersalnych lekaŭ ad raku, piša bbc.com.
Mietad pakul nie byŭ klinična vyprabavany, adnak daśledčyki kažuć, što ŭ jaho vielizarny patencyjał.
Navukoŭcam udałosia vyjavić admysłovy vid T-limfacytaŭ — kletki, jakaja ŭ arhaniźmie čałavieka adkazvaje za imunnuju reakcyju.
Adnak znojdzienaja navukoŭcami kletka, u adroźnieńnie ad inšych, moža procidziejničać roznym vidam pahroz.
Na pavierchni T-limfacytaŭ (abo T-kletak) jość chimičnyja receptary, z dapamohaj jakich jany vyznačajuć antyhieny, niebiaśpiečnyja dla arhanizmu.
Kamandzie navukoŭcaŭ udałosia prymusić znojdzieny imi vid T-limfacytaŭ atakavać šyroki śpiektr rakavych kletak.
Mietad byŭ vyprabavany na kletkach raka lohkich, raka kryvi, kišačnika, hrudziej, kostak, prastaty, jaječnikaŭ i šyjki matki.
Limfacyt źniščaŭ rakavyja kletki i nie čapaŭ zdarovyja.
Jak mienavita T-limfacyt adroźnivaje rakavyja kletki ad zdarovych, pakul niezrazumieła. Jaho receptar uzajemadziejničaje z malekułaj pad nazvaj MR1, jakaja jość na pavierchni kožnaj kletki čałaviečaha arhanizmu.
Ličycca, što rakavyja kletki «vykarystoŭvajuć» MR1 dla maskiroŭki ad imunnaj sistemy. Adnak vyjaŭleny ŭ Kardyfie T-limfacyt, miarkujuć daśledčyki, moža atrymlivać ad MR1 sihnał ab tym, što mietabalizm kletki parušany, i što heta kletka puchliny.
