Biełarusa padazrajuć u hučnych zakaznych zabojstvach va Ukrainie
Śledčyja Nacyjanalnaj palicyi Ukrainy padazrajuć hramadzianina Biełarusi Antona A. u datyčnaści da ŭdziełu ŭ złačynnaj hrupoŭcy, jakaja vykonvała zakaznyja zabojstvy, paviedamlaje Radyjo Svaboda.
Miarkujučy ź niekalkich sudovych rašeńniaŭ, biełarus Anton A. padazrajecca ŭ datyčnaści da zabojstva dyrektara ŭkrainskaj kampanii niamieckaha kancernu Saparol Paŭła Zmožnaha, jakoha rasstralali ŭ 2016 hodzie pad Kijevam u čas ranišniaj prabiežki, i načalnika adździełu reklamy Kijeŭskaha metrapalitenu Paŭła Mileńkaha. U 2019 hodzie jamu nanieśli try nažavyja ranieńni ŭ śpinu, ad jakich jon pamior na miescy napadu.
U niadzielu, 12 studzienia, Ministerstva ŭnutranych spravaŭ Ukrainy zajaviła, što hetaja ž hrupoŭka datyčnaja da arhanizacyi i zabojstva ŭ 2017 hodzie Aminy Akujevaj, jakaja vajavała na ŭschodzie Ŭkrainy ŭ składzie čačenskaha dobraachvotnickaha bataljonu imia Džachara Dudajeva.
Jak paviedamiła Svabodzie advakatka biełarusa Volha Miralubava, pakul što jaje padabaronnamu inkryminujuć dva epizody — zabojstvy Paŭła Zmožnaha i Paŭła Mileńkaha: «Učora ja ź im razmaŭlała, jaho nie zatrymlivali ŭ spravie Akujevaj».
«Anton byŭ zatrymany ŭ vieraśni minułaha hodu — spačatku jaho trymali pad chatnim aryštam, potym peŭny čas — u śledčym izalatary, ale znoŭ vyzvalili, ciapier užo pad tak zvany «načny aryšt». Jon u šoku ad hetaj sytuacyi i nie pryznaje svajoj viny. Ja taksama nia baču pakul ćviordych dokazaŭ z tych materyjałaŭ, jakija nam dali na aznajamleńnie. Ale pakul adbyvajecca dasudovaje raśśledavańnie my nia majem dostupu da ŭsich materyjałaŭ spravy», — paviedamiła Volha Miralubava.
Pavodle advakatki, prynamsi ŭ adnym epizodzie jaje padabaronny maje alibi, i pravaachoŭnyja orhany pavinny jaho pravieryć.
«Śledztva nie daje dakładnaha aznačeńnia roli Antona ŭ inkryminavanych epizodach. Aproč taho, u adnoj spravie (pra zabojstva dyrektara ŭkrainskaj kampanii niamieckaha kancernu Saparol. — RS) adznačajecca, što jon razam ź inšaju asobaju stralaŭ u achviaru. Na kurok naciskali adrazu dva čałavieki? Heta mahčyma?», — dadała juryst.
Volha Miralubava taksama paviedamiła, što hramadzianin Biełarusi znachodzicca na terytoryi Ŭkrainy lehalna — jon maje vid na časovaje žycharstva, žonku i dačku. Advakatka dadała, što pakul što Anton A. nie źviartaŭsia ŭ ambasadu Biełarusi va Ŭkrainie pa konsulskuju dapamohu.
Pavodle palicyi, u złačynnuju hrupoŭku ŭvachodziła siem asobaŭ. Jana była stvoranaja ŭ žniŭni 2016 hodu i praisnavała da vieraśnia 2019-ha, kali bolšaść jaje ŭdzielnikaŭ byli zatrymanyja. Śledčyja śćviardžajuć, što asablivaściu arhanizacyi była «specyjalizacyja» na vykanańni naŭmysnych zabojstvaŭ na zakaz, jakija jany hruntoŭna rychtavali. Pavodle śledztva, Anton A. byŭ nibyta vykanaŭcam zabojstvaŭ.
U vypadku, kali śledčyja daviaduć u sudzie datyčnaść biełarusa da hetaj hrupoŭki i zabojstvaŭ, jamu pahražaje pazbaŭleńnie voli na termin ad 10 da 15 hadoŭ albo pažyćciovaje źniavoleńnie.
