Łukašenka: U adzinstvie vialikuju rolu adyhrała carkva. Nie tolki pravasłaŭnaja — usie kanfiesii
Rastvo Alaksandr Łukašenka pravodzić u chramie ŭ honar ikony Božaj Maci «Dziaržaŭnaja», jaki ŭvachodzić u skład raźmieščanaha ŭ Minsku Śviata-Jelisaviecinskaha žanočaha manastyra, piša sb.by.
Źviartajučysia da prychadžanaŭ, jakich na słužbie sabrałasia niekalki sotniaŭ, kiraŭnik dziaržavy padvioŭ vyniki hoda i adznačyŭ, što hałoŭnym było toje, što my zachavali mir i spakoj našaj ziamli. U tym liku kanfiesijny:
— Heta toje, čym hanarycca lubaja dziaržava. Pierš za ŭsio naša Biełaruś.
Pryčym u adzinstvie, źviarnuŭ uvahu jon, vialikuju rolu adyhrała carkva. Nie tolki pravasłaŭnaja — usie kanfiesii.
Alaksandr Łukašenka pieradaŭ u dar chramu ikonu «Rastvo Chrystova». Hety abraz biełaruskaha aŭtara Andreja Ščarbinina, dadaje BiełTA.
U svaju čarhu nastajaciel chrama protaijerej Andrej Lemiašonak pieradaŭ u dar kiraŭniku dziaržavy abraz śviatoj prapadobnaj Jeŭfrasińni Połackaj.
Chram u honar ikony Božaj Maci «Dziaržaŭnaja» uvachodzić u skład manastyrskaha kompleksu Śviata-Jelisaviecinskaha žanočaha manastyra. Chram pabudavany ŭ 2001-2007 hh., a aśviečany 18 kastryčnika 2008 h. mitrapalitam Minskim i Słuckim Fiłaretam. Akramia chramaŭ, roznych majsterniaŭ manastyr maje ŭ pryharadzie svoj padvorak, dzie stvorany centr dla apieki sacyjalna nieabaronienych ludziej. Siostry manastyra niasuć pasłušenstva ŭ Respublikanskaj kliničnaj psichijatryčnaj balnicy, psichanieŭrałahičnym internacie, u Navukova-daśledčym instytucie pulmanałohii i ftyzijatryi ŭ Navinkach.
