Tramp: ZŠA hatovyja nanieści ŭdar pa 52 iranskich abjektach
Fota: Gage Skidmore, flickr.com
Prezident ZŠA Donald Tramp u svaim Twitter-akaŭncie zajaviŭ pra hatoŭnaść atakavać 52 iranskija abjekty ŭ vypadku ŭdaraŭ Tehierana suprać amierykancaŭ.
«Niachaj heta pasłužyć papiaredžańniem. Kali Iran naniasie ŭdar pa amierykancach abo amierykanskich abjektach, my ŭžo naceleny na 52 iranskija abjekty (jakija pradstaŭlajuć 52 amierykanskich zakładnikaŭ, zachoplenych Iranam šmat hadoŭ tamu)», — napisaŭ Tramp.
Jon udakładniŭ, što niekatoryja z abjektaŭ, na jakija nacelilisia Štaty, — važnyja dla Irana i iranskaj kultury. Udary pa ich, pa słovach kiraŭnika Biełaha doma, buduć naniesienyja «vielmi chutka i vielmi mocna».
3 studzienia ZŠA nanieśli rakietny ŭdar pa aeraporcie Bahdada. Padčas napadu zahinuŭ hienierał elitnaha iranskaha śpiecpadraździaleńnia «Al-Kuds» Korpusa vartavych isłamskaj revalucyi Kasiem Sulejmani. Jaho likvidacyju ŭ Pientahonie nazvali samaabaronaj. Pastajanny pradstaŭnik Irana pry AAN paraŭnaŭ hetaje zabojstva z abviaščeńniem vajny i paabiacaŭ ZŠA surovuju pomstu.
4 studzienia nad miačećciu Džamkaran u iranskim śviatym horadzie šyitaŭ Kum uźniali čyrvony ściah pomsty. Jon aznačaje žadańnie adpomścić za zabojstva Sulejmani i inšych zahinułych padčas amierykanskaha ŭdaru. Ściah uzdymali pad śpieŭ viernikaŭ, u jakim jany źviartalisia da Ałacha.