Za sistematyčny padman Rasiju na čatyry hady adchilili ad Alimpijadaŭ i čempijanataŭ śvietu
Vykankam Suśvietnaha antydopinhavaha ahienctva (WADA) adnahałosna pryniaŭ rekamiendacyju kamiteta arhanizacyi pazbavić Rasijskaje antydopinhavaje ahienctva statusu adpaviednaści Suśvietnaha antydopinhavaha ahienctvu i pazbavić Rasiju na čatyry hady prava ŭdzielničać u bujnych spartyŭnych mižnarodnych mierapryjemstvach, u lik jakich uvachodziać Alimpijady i čempijanaty śvietu. Pra heta paviedamlaje pres-słužba WADA, piša TASS.
«Rekamiendacyja kamiteta pa adpaviednaści była ŭchvalena adzinahałosna», — skazana ŭ paviedamleńni.
Akramia taho, Rasija na čatyry hady pazbavicca prava prymać čempijanaty śvietu i padavać zajaŭki na ich praviadzieńnie, taksama vykankam WADA ŭvioŭ čatyrochhadovuju zabaronu na naviedvańnie mižnarodnych spartyŭnych mierapryjemstvaŭ rasijskimi dziaržsłužačymi i kiraŭnictvam Alimpijskaha kamiteta Rasii (AKR) i Paralimpijskaha kamiteta Rasii (PKR).
Nahadajem, što kamitet pa adpaviednaści WADA 25 listapada rekamiendavaŭ admović rasijanam u dopusku na mižnarodnyja spabornictvy ŭ nastupnyja čatyry hady, a taksama zabaranić Rasii prymać mižnarodnyja turniry na svajoj terytoryi. Rašeńnie ŭ arhanizacyi patłumačyli parušeńniem Maskvoj antydopinhavych praviłaŭ, u pryvatnaści manipulacyjami z dopinh-probami Maskoŭskaj antydopinhavaj łabaratoryi za pieryjad z 2012 pa 2015 h. Ab manipulacyjach z dopinh-probami raniej raspavioŭ kiraŭnik RUSADA Juryj Hanus. Źmieny, pavodle jaho słoŭ, unosilisia ŭ śniežni 2018 h. i studzieni hetaha hoda, kali łabaratoryju kantralavaŭ Śledčy kamitet Rasii napiaredadni pieradačy bazy źviestak ekśpiertam WADA.
Paźniej Mižnarodny alimpijski kamitet (MAK) zajaviŭ, što adkaznaść za zachavanaść źviestak łabaratoryi lažała na rasijskich uładach, a značyć, mienavita jany adkaznyja za mahčymyja manipulacyi. U toj ža čas MAK adznačyŭ, što spartyŭny ruch, u tym liku Alimpijski kamitet Rasii (AKR) i jaho členy, nie ŭdzielničali ŭ hetym. Tamu MAK padtrymaŭ ideju dazvolić «čystym» spartsmienam, nie abvinavačanym va ŭžyvańni dopinhu, vystupać pad niejtralnym ściaham, dadajuć vedomosti.ru
