32-hadovaja deputatka-kamunistka: Nie čytała Marksa i Lenina, na pracu dabirajusia na paputkach
Adnoj z najmaładziejšych deputatak novaha sklikańnia Pałaty pradstaŭnikoŭ stała Natalla Hołub. Joj 32 hady, a abranaja Hołub pa Ivacevickaj akruzie ŭ Bresckaj vobłaści.
Hołub uznačalvaje BRSM u Biarozoŭskim rajonie.
Kab bolej daviedacca pra abrańnicu, «Naša Niva» patelefanavała joj i zadała niekalki pytańniaŭ.
«Naša Niva»: Raskažycie krychu pra siabie.
Natalla Hołub: Naradziłasia ja ŭ Babrujsku, ale pa raźmierkavańni trapiła ŭ Biarozaŭski rajon. Heta nie čužyja dla mianie miaściny, ź vioski Halicy była maja mama. Jana tam naradziłasia, staleła, chadziła ŭ škołu. Kali ja pryjechała pa raźmierkavańni, to žyvym byŭ jašče moj dziadula. Jon byŭ pieradavikom pracy, pracavaŭ traktarystam u kałhasie «Zapaviety Lenina». Uznaharodžany ordenam Lenina ŭ 1984 hodzie.
«NN»: Vy ž skončyli Sielskahaspadarčuju akademiju?
NH: Tak, skončyła ŭ 2010 hodzie. Fakultet buchhałtarskaha ŭliku i aŭdytu, skončyła z adznakaj. Tak ja i trapiła na pracu ŭ SPK «Viniec». Pierad hetym ja prachodziła tut svaju praktyku, mnie ŭsio padabałasia, tamu i raźmierkavałasia siudy.
«NN»: Da raźmierkavańnia roznyja staŭleńni. Adny nazyvajuć heta ledź nie rabstvam, inšyja radujucca, što moładzi dajuć pieršaje miesca pracy. Što vy dumajecie?
NH: Kaniečnie, dobra. Heta ž pieršaje pracoŭnaje miesca. Kali pajści na niejkuju pracu, u ciabie spytajuć pra dośvied i pracoŭny staž. A dzie jaho ŭziać maładomu śpiecyjalistu? Tolki pa raźmierkavańni. I vielmi dobra, što jość takaja mahčymaść.
U SPK «Viniec» ja adpracavała piać hadoŭ. Spačatku była prosta buchhałtaram, paśla stała namieśnikam hałoŭnaha buchhałtara. U 2011 hodzie ja sama pastupiła ŭ Akademiju kiravańnia pry prezidencie atrymlivać druhuju vyšejšuju adukacyju. Heta byŭ instytut kiraŭničych kadraŭ, a śpiecyjalnaść — «Dziaržaŭnaje kiravańnie i prava». Vučyłasia zavočna čatyry hady. Skončyła ŭ 2015 hodzie. U hety čas u sielskaj haspadarcy «Viniec» ja ŭžo pracavała sakratarom i juryskonsultam.
«NN»: A potym pajšli pa linii BRSM?
NH: Ja kaliści prafiesijna zajmałasia turyzmam. Na pradpryjemstvie stała arhanizoŭvać kamandy, jeździli na turźlot, dzie zaniali pieršaje miesca. Byli futboł, valejboł. Maimi zadačami było znajści moładź i arhanizavać kamandu. «Dni moładzi» arhanizoŭvali, inšyja mierapryjemstvy. U mianie ŭsio heta vydatna atrymlivałasia, tak mianie zaŭvažyli.
«NN»: I zaprasili na pracu ŭ Biarozu?
NH: Tak. Chacia ja ŭ horad nie pierajazdžała, pa-raniejšamu žyvu ŭ vioscy, jezdžu ŭ Biarozu na pracu. Raniej u «Viniec» było 3,5 kiłamietra da pracy, a ciapier - 10.
«NN»: Na pracu jeździcie aŭtamabilem?
NH: Nie, jak atrymajecca.
«NN»: Što, i paputki byvaje łovicie?
NH: Tak, i takoje jość.
«NN»: Žyllo vy majecie svajo?
NH: Tak, mnie ž u spadčynu zastałosia. Spačatku tam žyli baćki majoj mamy, potym mamie pierajšło, a šeść hadoŭ tamu mama zahinuła, i heta adyšło mnie.
«NN»: A što vy robicie ŭ BRSM?
NH: U mianie jość hałoŭny buchhałtar i viadučy śpiecyjalist u Biełaaziorsku. Najpierš mnie daviałosia arhanizavać kamandnuju pracu. Heta nie było składana, bo jašče padčas pracy ŭ sielskaj haspadarcy pierad mnoj staviłasia šmat zadač, i važna było ŭsio paśpieć: i adkazać na zvanki, i napisać listy i h.d. Tamu ja pracy takoj nie bajałasia. Ź lotu stała razumieć sutnaść pracy, što na joj rabić. U nas ža kirunki jość: i patryjatyčnaje vychavańnie, i studenckija atrady, i vałanciorskaja dziejnaść, achova paradku, sacyjalnyja sietki. Vielmi šmat abaviazkaŭ, pa jakich patrebny byŭ dakładny płan, što treba rabić. Voś heta i jość maja praca.
«NN»: Natalla, čamu vy pajšli ŭ palityku?
NH: Napeŭna, mnie chočacca prasoŭvać nie tolki ŭłasnyja inicyjatyvy, a bolš havaryć pra toje, što chvaluje narod. Heta zvyčajnyja žyćciovyja pytańni: i dobraŭparadkavańnia horad, i inšyja.
«NN»: Heta była vaša ŭłasnaja inicyjatyva pajści ŭ deputaty ci niechta prapanavaŭ?
NH: Ułasnaja, ja ŭ minułym hodzie stała deputatam sielskaha savieta. Mabyć, i niapravilna kazać, što heta samy nizki ŭzrovień. Ale heta jakraz tyja deputaty, jakija niepasredna pracujuć z nasielnictvam. Hod užo prajšoŭ i ja pabačyła svaje mahčymaści i viedy, kab dapamahać ludziam. Kali ŭ hetym hodzie abviaścili parłamienckija, to ja padumała, a čamu b i nie?
«NN»: Ludzi nie bajalisia vas padtrymlivać praz uzrost?
NH: Dy nie. Jany ž bačyli, jaki ja čałaviek, jak spraŭlajusia sa svaimi zadačami, jak vychodžu na kantakt ź ludźmi, mahła niešta padkazać u rašeńni pytańniaŭ. Ja ž maju dośvied jak ekanamičny, tak i jurydyčny. Tamu i padtrymali moładź.
«NN»: Vy siabra Kamunistyčnaj partyi Biełarusi. Čamu maładaja dziaŭčyna pryjšła da kamunistaŭ?
NH: Nu było takoje. Zdajecca, u 2018 hodzie, a moža i nie. Pryjšła na adno mierapryjemstva, parazmaŭlała. Pasłuchała, jakija jany padtrymlivajuć inicyjatyvy, kirunki dziejnaści… Tak i ŭstupiła ŭ hetuju partyju. Značyć, padzialaju ich pohlady.
«NN»: Marksa i Lenina vy čytali?
NH: Napeŭna, nie čytała.
«NN»: Dyk a jakija ich pohlady vy padtrymlivajecie? Byli stalinskija represii, što vy pra ich dumajecie?
NH: Vy chočacie pra heta napisać?
«NN»: Kaniečnie, chočam. Niečym ža vy kiravalisia, kali prychodzili ŭ KPB.
NH: Nu kiravałasia. Ja b, mabyć, nie adkazvała b na hetaje pytańnie.
«NN»: Ź jakim adčuvańniem vy pajedziecie ŭ Minsk na pieršuju siesiju?
NH: Chvalavańnie ŭ pieršuju čarhu. Mnie chočacca… jak heta vyrazić słovami? Chaču adstojvać intaresy svaich vybarcaŭ, kab u mianie ŭsio atrymałasia, i ja nie padviała ludziej.
«NN»: Moža, užo majecie niejkija idei zakonaprajektaŭ? Peŭnyja «chatnija narychtoŭki».
NH: Niejkija jość, ale bolš ja chaču prasoŭvać inicyjatyvy, što buduć sychodzić ad vybarcaŭ, što chvaluje narod.
«NN»: A što chvaluje narod u Biarozie i Ivacevičach?
NH: U pieršuju čarhu ich chvaluje dobraŭparadkavańnie nasielenych punktaŭ, jakaść pitnoj vady. Heta chvaluje žycharoŭ našaha rehijonu.
«NN»: Ale heta ŭsio praca na miescy, a što vy budziecie rabić u parłamiencie?
NH: Byli dumki… Byli adnosna ŭdaskanaleńnia sistemy adukacyi.
«NN»: Raskažycie pra heta.
NH: U mianie jość na hety kont dumki. Nu, nie viedaju. Kab u našych baćkoŭ było bolš adkaznaści za dziaciej. Piedahoh adkazvaje za dzicia tolki na terytoryi škoły. Adkazvaje za viedy, za patryjatyčnaje vychavańnie moładzi, a ŭžo baćki adkazvajuć za dzicia za miežami škoły. Pavinna adbyvacca takoje raźmiežavańnie zony adkaznaści.
«NN»: Natalla, što vy dumajecie pra sajuz Biełarusi i Rasii? Patrebny jon nam ci nie?
NH: Viedajecie, vy takija pytańni zadajacie…
«NN»: Vy ž palityk!
NH: My pačynajučyja palityki. Tyja, chto adpracavaŭ bolš času, u kaho byŭ termin u parłamiencie, u ich bolš pohladaŭ.
«NN»: U vas jość u palitycy ŭzor, na kaho chočacca raŭniacca?
NH: Ja, moža, nie tak i mocna sačyła. Ale raniej kiraŭnik «Vinieca» Jaŭhien Šymčuk, kandydat ekanamičnych navuk, byŭ u parłamiencie. Ja b chacieła na jaho raŭniacca.
