Stała viadoma, chto ŭznačalić delehacyju Biełarusi na pierapachavańni Kalinoŭskaha
Ihar Pietryšenka, fota Voli Aficeravaj
Aficyjnuju biełaruskuju delehacyju ŭznačalić vice-premjer Ihar Pietryšenka, paviedamlaje na svajoj staroncy ŭ fejsbuku MZS Biełarusi
«Niekali my abiacali Andreju Horvatu dy i jašče šmat kamu sumlenna zrabić svaju pracu pa adnym značnym pytańni, rastłumačyć i paviedamić ab vynikach, — paviedamlaje MZS. — Siońnia ŭ MZS Biełarusi litoŭskamu boku, jaki pradstaŭlaŭ pasoł Litvy ŭ našaj krainie, byli aficyjna pieradadzieny vyniki ekśpiertyzy (u tym liku DNK) materyjałaŭ z mahčymaha pachavańnia Viktara Kalinoŭskaha ŭ Śvisłačy. (…)
Siońniašniaja pieradača dazvolić paraŭnać vyniki DNK-ekśpiertyz ź Biełarusi i Litvy, što nieabchodna dla poŭnaj identyfikacyi mahčymych astankaŭ Kastusia Kalinoŭskaha ŭ Vilni. Harantyi, što pieradadzienyja astanki naležać mienavita Viktaru Kalinoŭskamu, my dać nie možam, ale hety šlach z navukovaha punktu hledžańnia treba prajści da kanca, heta naš uniosak, tamu ličym svaim abaviazkam sumiesna ź litoŭskimi kalehami pracavać nad ustalavańniem praŭdy. Lubaja, navat samaja maleńkaja začepka moža apynucca klučavoj», — havorycca ŭ paviedamleńni.
«My ŭdziačny litoŭskamu boku za aficyjnaje zaprašeńnie Biełarusi na ŭračystuju cyrymoniju pierapachavańnia ŭdzielnikaŭ paŭstańnia 1863 hoda, jakaja adbudziecca 22 listapada ŭ Vilni. Sumiesnaja historyja patrabuje sumiesnych namahańniaŭ. Rady, što takoje razumieńnie jość u abodvuch bakoŭ. Z zadavalnieńniem pryniali heta zaprašeńnie. Delehacyju našaj krainy na mierapryjemstvie ŭznačalić namieśnik premjer-ministra Ihar Pietryšenka», — adznačaje MZS..
