Łukašenka: Što vam nie padabajecca ŭ Biełarusi ŭ płanie pravoŭ čałavieka?
Paśla pieramoŭ z prezidentam Aŭstryi Alaksandr Łukašenka adkazaŭ na pytańni žurnalistaŭ.
Što tyčycca elemienta aŭtarytarnaści ŭłady, Alaksandr Łukašenka kanstatavaŭ, što sapraŭdy hetaja śfiera ŭ Biełarusi mocna adroźnivajecca ad sistemy kiravańnia dziaržaŭnymi instytutami, funkcyjanavańnia hramadstva i ekanomiki ŭ Aŭstryi.
Jon adznačyŭ, što časam niezrazumieła, što majecca na ŭvazie, kali zadajecca pytańnie na temu vykanańnia pravoŭ čałavieka: «Što vam nie padabajecca ŭ Biełarusi ŭ płanie pravoŭ čałavieka? Jość prava na žyćcio. Heta hałoŭnaje prava. Prava na pracu — čałaviek pavinien mieć harantyju pracavać u svajoj krainie. A kali jość žadańnie pajechać u Aŭstryju, Polšču ci inšyja krainy. Vy chočacie skazać, što my kamuści zabaraniajem hety vyjezd? Nie skažacie».
Kiraŭnik dziaržavy adznačyŭ taksama, što jość ahulnapryznanaje prava na atrymańnie adukacyi. «I nie prosta adukacyja, a za košt dziaržavy — biaspłatnaja adukacyja dla čałavieka. Jana ŭ vašaj krainie tak raźvita, jak u Biełarusi? Ja adrazu mahu dać adkaz: daloka nie tak», — padkreśliŭ Alaksandr Łukašenka. U svaju čarhu ŭ Biełarusi ŭsie atrymlivajuć ahulnuju siaredniuju adukacyju, a kala pałovy zatym atrymlivajuć biaspłatnuju vyšejšuju adukacyju. Akramia taho, u krainie biaspłatnaja achova zdaroŭja dla ŭsich hramadzian.
«Ja chacieŭ by, kab vy nazvali chacia b adnu krainu ŭ Jeŭrasajuzie, jakaja zmahła b pachvalicca hetymi dasiahnieńniami, — zaŭvažyŭ biełaruski lidar. — Ja mahu pieraličvać mnohaje. Ale kali žurnalist mnie zadaje pytańnie pa niekatorych pravach čałavieka, ja adrazu ŭ jaho vačach čytaju adno niamoje pytańnie: ŚMI i inšaje… Vy kali-niebudź čuli, što ŭ Biełarusi zabaranili internet? Napeŭna, hetyja paproki ŭžo daŭno adyšli ŭ niabyt. Syšli ŭ niabyt. Siońnia niemahčyma niešta zabaranić, asabliva ŭ ŚMI».
Havoračy ab svabodzie infarmacyi, Łukašenka dadaŭ: «Adkryvajcie luby miesiendžar, telefon, płanšet, kampjutar, i vy atrymajecie lubuju infarmacyju. Što tyčycca mianie, aŭtarytarnaha lidara, jak vy skazali, pačytajcie, što za apošni miesiac pra mianie napisali, i vy žachnieciesia — pradstaŭnik demakratyčnaj krainy i demakratyčnaj presy».
Alaksandr Łukašenka adznačyŭ, što pytańnie žurnalista na temu pravoŭ čałavieka tradycyjnaje, ale absalutna ničoha nie maje ahulnaha z rečaisnaściu ŭ Biełarusi. «Jašče raz zaprašaju vas, jak šmatlikich žurnalistaŭ, pabyvać u nas u Biełarusi. Padstaŭ dla hetaha było šmat, u tym liku II Jeŭrapiejskija hulni. U budučyni čempijanat śvietu my razam z łatyšami pravodzim. Možacie raniej pryjechać, kab aznajomicca», — zaprasiŭ jon.
«Upeŭnieny, kali raniej pryjedziecie, to ŭ 2021 hodzie vy pryjedziecie ŭsioj siamjoj i sa svaimi siabrami ŭ Biełaruś. Heta kraina, kudy chočacca viarnucca lubomu čałavieku, jaki naradziŭsia ŭ Biełarusi. I heta kraina, dzie možna cicha i biaśpiečna adpačyć», — padkreśliŭ biełaruski lidar.
