Biust Ahinskamu ŭ Słonimie zrabiła pryvatnaja firma za svaje srodki
U Słonimie pobač z dramatyčnym teatram ustalavany biust byłoha starasty horada, viadomaha miecenata, paeta i kampazitara Michaiła Kazimira Ahinskaha. Na miescy ciapierašniaha dramatyčnaha teatra ŭ ChVIII stahodździ raźmiaščaŭsia teatr Ahinskaha, piša Narodnaja vola.
Viadomy dziaržaŭny dziejač Michaił Kazimir Ahinski pieratvaryŭ Słonim u sapraŭdny jeŭrapiejski kulturny centr, jaki ŭ CHUIII stahodździ nazyvali Paŭnočnymi Afinami. Mienavita za čas jaho praŭleńnia byŭ zbudavany vodny kanał, jaki złučyŭ Ščaru i Prypiać, dahetul funkcyjanuje i nosić zaraz jahonaje imia. Pry Ahinskim była adkryta pieršaja ŭ horadzie drukarnia i teatr z baletnaj škołaj, jaki byŭ viadomy daloka za miežami Słonima.
Biust Ahinskamu byŭ vykanany na miascovym pryvatnym pradpryjemstvie «Hranvi», jakoje zajmajecca vyrabam nadmahilnych pomnikaŭ, hranitnych stalešnic, padakońnikaŭ, stałoŭ, balasin, leśvic i inšaha.
Kiraŭnik «Hranvi» Uładzimir Vilkicki raspavioŭ «Narodnaj voli», što ideja ŭstalavańnia biusta Ahinskamu naležyć hramadskamu abjadnańniu «Słonimski Kanał Ahinskaha» siabram jakoha i jon źjaŭlajecca. Akramia hetaha siabry hramadskaha abjadnańnia pradstavili materyjał dla pastamienta pad biust.
«Ja naahuł sam nie skulptar, ale razam z supracoŭnikami svajoj firmy z zadavalnieńniem pracavaŭ nad biustam Ahinskamu, — padkreślivaje Vilkicki. — I ŭ pryncypie my ŭsio astatniaje zrabili za srodki svajoj firmy. Usie, chto pracavaŭ sa mnoju nad biustam, dobra viedali kamu jon pryznačajecca i my hanarymsia, što zdoleli zrabić svoj ŭniosak va ŭviekaviečvańnie pamiaci takoha vialikaha čałavieka, jaki tak šmat zrabiŭ dla našaha horada».
Biust pavinny byli adkryć jašče ŭ vieraśni napiaredadni Dnia biełaruskaha piśmienstva, jaki adbyvaŭsia sioleta ŭ Słonimie, ale paźniej pryniali inšaje rašeńnie i ŭračystaje adkryćcio pomnika pavinna adbycca 6 listapada.
