Pavuki padkazali navukoŭcam ideju dvuchbakovaha płastyru dla sklejvańnia ran
Amierykanskija navukoŭcy stvaryli dvuchbakovy płastyr, jaki zdolny sklejvać chirurhičnyja rany litaralna za niekalki siekund. Ideju vynachodki daśledčyki zapazyčyli ŭ pavukoŭ, «klej» jakich dazvalaje łavić nasiakomych navat u daždžlivaje nadvorje, pakolki pavucina absarbuje vadu, piša BBC.
Studenty Masačusieckaha technałahičnaha instytuta (MIT) pasprabavali stvaryć padobny materyjał. Vyśvietliłasia, što jon vydatna sklejvaje skuru i lohačnuju tkanku śviniej — a značyć, jaho možna vykarystoŭvać u chirurhii i ŭ budučyni jon, mahčyma, dazvolić admovicca ad nieabchodnaści nakładańnia švoŭ.
Zakryvać paślaapieracyjnyja rany nadzvyčaj składana, pakolki krai raśsiečanaj tkanki ciažka źvieści razam dosyć ščylna z-za kryvacioku i vadkaściaŭ.
Nakładańnie švoŭ nie zaŭsiody efiektyŭna spraŭlajecca z hetaj zadačaj, a drenna zakrytaja rana pahražaje zaražeńniem i moža być vielmi balučaj dla pacyjenta.
Isnujučyja na siońnia rečyvy dla zakryćcia ran dubianiejuć tolki praź niekalki chvilin paśla naniasieńnia, a za hety čas klej moža pratačycca hłybiej u arhanizm, zakranuŭšy inšyja orhany.
Navukoŭcy vykarystali paliakryłavuju kisłatu — jany nanieśli jaje na abodva baki płastyru, kab toj moh chutka ŭvabrać vadkaść pa krajach rany, złučyŭšy ich jak maha bolš ščylna.
Kali dadać u skład płastyru žełacin ci chitazan, toj moža zachoŭvać svaju formu na praciahu niekalkich dzion i navat tydniaŭ, śćviardžajuć navukoŭcy.
Novy płastyr užo byŭ vyprabavać na roznych orhanach pacukoŭ i śviniej — u tym liku na tkankach tonkaj kiški, straŭnika, piečani i skury.
