Turčyn: Možna padstroicca pad patreby prahresu, možna ihnaravać. Ale nie zatarmazić. Tannyja nafta i haz adychodziać na druhi płan
Fota Nadziei Bužan.
Technałohija źmianiaje i žyćcio, i ekanomiku, niezaležna ad voli dziaržavy. Dziaržaŭnaja palityka moža ci padstroicca pad patreby prahresu, abo moža ihnaravać. Ale zatarmazić hetyja pracesy nie ŭdasca. U pieršym vypadku prahres paskorycca, u druhim — pojdzie mima dziaržavy, zajaviŭ pieršy vice-premjer Alaksandr Turčyn, vystupajučy na «Kastryčnickim ekanamičnym forumie — 2019», piša Tut.by.
Turčyn adznačyŭ, što maje namier padniać usiaho adnu temu — klučavuju dla biahučaha raźvićcia.
Skraznym pytańniem usich forumaŭ byli adnosiny dziaržavy i ekanomiki. Jakim pavinny być ŭdzieł dziaržavy ŭ ekanomicy? Abmiežavanym abo ŭsiopranikalnym? Jak adyści ad cisku na biznes? Jak ŭzhadnić intaresy biznesu i patrebnaści biudžetu? Ci patrebna pryvatyzacyja? Efiektyŭny ci maštabny siektar dziaržułasnaści?
Pytańni, pryznaŭ pieršy vice-premjer, časta pavisali ŭ pavietry.
— Siońnia my nazirajem cikavuju karcinu — technałohii vielmi aryhinalna pačynajuć vyrašać sprečki ekanamistaŭ. Hladzicie. My hadami jak mahli zaścierahali ŭnutrany rynak, da prykładu, tavaraŭ lohkaj pramysłovaści. Narakali to na čaŭnakoŭ, to na drobnych handlaroŭ. Ale źjaviŭsia AliExpress, źjavilisia płatformy, i stała zrazumieła: usie našy miery pa abaronie rynku stali biessensoŭnyja i bieskarysnyja. My zmahalisia za zachavańnie pracoŭnych miescaŭ u cechach i na palach, ale ličbavizacyja razam z rabatyzacyjaj stavić kryž na hetych namahańniach. Pierad śvietam u poŭny rost stanovicca prablema nulavoj pracoŭnaj siły.
Alaksandr Turčyn adznačyŭ, što ŭžo vidavočna, što novyja pracoŭnyja miescy buduć stvaracca dzie zaŭhodna, ale nie ŭ industryjalnym i ahrarnym siektary.
— Narešcie, u centry ekanamičnaj palityki my stavili pytańni tannych nafty i hazu. A zaraz i dla raźvićcia, i dla vyžyvańnia hetyja pytańni pierastajuć być krytyčnymi. Raźvićcio technałohij pavolna, ale dakładna, advodzić vuhlevadarody na druhi płan, — zajaviŭ śpikier.
Pieršy vice-premjer adznačyŭ pośpiechi biełaruskaha PVT.
— Tempy na paradak pieraŭzychodziać usie astatnija haliny i śfiery, našym nievialikim rostam my abaviazany parku. IT-halina stała ŭžo naroŭni z ahrarnaj śfieraj, našaj tradycyjnaj halinoj.
Nastupnaja piacihodka, padkreśliŭ Turčyn, pavinna stać i pa naźvie, i pa duchu ličbavaj.
