Achoŭniki Łukašenki zaniali 5-je miesca na čempijanacie śvietu siarod ciełaachoŭnikaŭ u Kijevie
Ciełaachoŭniki prezidentaŭ Ukrainy, Małdovy i Hruzii pieramahli na sioletnim čempijanacie śvietu ŭ šmatborji Bodyguard-2019, jaki prajšoŭ u Kijevie 7-10 vieraśnia. Kamanda Słužby biaśpieki prezidenta Biełarusi zaniała 5-je miesca, paviedamlaje Radyjo Svaboda.
U čempijanacie ŭdzielničali 24 kamandy — orhanaŭ biaśpieki, pravaachoŭnych i śpiecyjalnych słužbaŭ, a taksama słužbaŭ biaśpieki prezidentaŭ Ukrainy, Kitaja, Biełarusi, Małdovy, Bałharyi, Hruzii, Rumynii, Iardanii i Sierbii.
Usie vidy spabornictvaŭ hruntavalisia na lehiendzie ab napadzie na pieršuju asobu dziaržavy ŭ roznych umovach, a ciełaachoŭniki musili prademanstravać svaje navyki chutkaha reahavańnia na pahrozy žyćciu i zdaroŭju: abaranić, zatrymać napadnika, adstralacca, akazać pieršuju damiedycynskuju i miedycynskuju dapamohu i ŭ vypadku ranieńnia vyvieźci VIP-piersonu ŭ biaśpiečnaje miesca. Na reakcyju — usiaho niekalki siekundaŭ.
Biełaruskaja kamanda stała druhoj u vykanańni zadańnia pa damiedycynskaj dapamozie i ekstrannaj evakuacyi paranienaj achoŭnaj asoby. Ciełaachoŭniki Łukašenki taksama ŭvajšli ŭ trojku lidaraŭ jašče ŭ dvuch vidach spabornictvaŭ — achovie pry piešym supravadžeńni va ŭmovach masavaha mierapryjemstva, kali na abjekta ichnaj achovy napadaje złamyśnik, i vykarystańnie pryjomaŭ rukapašnaha boju ŭ vypadku napadu na ich samich.
Ale pamyłki, dapuščanyja ŭ troch inšych vidach zmahańniaŭ (pieraadoleńnie pałasy pieraškod na aŭtamabili, stralańnie padčas piešaha supravadžeńnia i z aŭtamabila, pošuk vybuchovych pryładaŭ u aŭtamabili) nie dazvolili biełaruskaj kamandzie ŭtrymacca ŭ trojcy lidaraŭ u ahulnakamandnym zaliku.
Z mužčynami spaborničali i žančyny
Na roŭnych z mužčynskimi kamandami zmahalisia i dźvie žanočyja — jany pradstaŭlali Upraŭleńnie dziaržaŭnaj achovy i Dziaržaŭnaj fiskalnaj słužby Ukrainy.
«My achoŭvajem žančyn i dziaciej, jakija pryjazdžajuć va Ukrainu ŭ składzie aficyjnych delehacyj. Pracujem, jak i ŭ inšych krainach, u jakich vyznačana, što žančyn pavinny achoŭvać žančyny. Bo, pavodle ŭmoŭ biaśpieki, ciełaachoŭnik musić supravadžać asobu paŭsiul, ale jość takija vypadki i miescy, kudy mužčyna-ciełaachoŭnik nie moža supravadžać žančynu, jakuju treba achoŭvać», — skazała Svabodzie słužboŭca Upraŭleńnia dziaržaŭnaj achovy Ukrainy Volha Radčanka.
Žanočym kamandam, jak śćviardžaje Volha, składana spaborničać z mužčynami, bo treba pracavać u dva razy bolš, kab demanstravać hodny ŭzrovień: «Treba stała ŭdaskanalvacca, treniravacca i trymać siabie ŭ formie. Kab być dobrym ciełaachoŭnikam, treba šmat taktyčnaj, fizičnaj i strałkovaj padrychtoŭki».
Jak paviedamili pradstaŭniki biełaruskaj kamandy, u Słužbie biaśpieki Łukašenki žančyn-ciełaachoŭnic pakul niama.
