Premjeram Hruzii staŭ ministr, jaki žorstka razahnaŭ antyrasijskija pratesty
Parłamient Hruzii vykazaŭ votum davieru ŭradu na čale z byłym kiraŭnikom MUS Hieorhijem Hacharyjem, piša ria.ru.
Hacharyju padtrymali 98 z 150 deputataŭ. Takim čynam jany zaćvierdzili novaha premjera, abnoŭleny skład Kabinieta ministraŭ i ŭradavuju prahramu. Apazicyja ŭdzieł u hałasavańni nie brała.
Hacharyja staŭ piatym pa liku premjeram paśla pieramohi partyi «Hruzinskaja mara» na parłamienckich vybarach u 2012 hodzie.
2 vieraśnia były premjer Hruzii Mamuka Bachtadze zajaviŭ ab sychodzie z pasady, patłumačyŭšy svajo rašeńnie tym, što jon vykanaŭ usie svaje misii i zadačy.
Pa zakonie kandydaturu na pasadu premjera moža vyłučyć palityčnaja partyja, jakaja atrymała na parłamienckich vybarach najlepšy vynik - «Hruzinskaja mara». Jaje zasnavalnik i staršynia Bidzina Ivanišvili nie chavaŭ, što inicyjatyva vyłučeńnia kandydatury Hacharyi naležała jamu. Heta rašeńnie raskrytykavała apazicyja i jaje prychilniki.
Mienavita adstaŭki Hacharyi patrabavali try miesiacy ŭdzielniki pratestaŭ u Tbilisi. Jany ličyli, što Hacharyja pavinien panieści adkaznaść za razhon mitynhu ŭ centry Tbilisi ŭ noč na 21 červienia. Pry razhonie akcyi, jakaja była spravakavanaja vizitam i vystupam u parłamiencie rasijskaha deputata Siarhieja Haŭryłava, paciarpieli 240 čałaviek.
Paśla taho jak było abvieščana, što Hacharyja moža zaniać pasadu kiraŭnika ŭrada, u Tbilisi padniałasia novaja pratestnaja chvala.
