Mierkavańnie: čamu Biełarusi patrebna administracyjna-terytaryjalnaja reforma
Znoŭ pajšli razmovy pra administracyjna-terytaryjalnuju reformu ŭ Biełarusi. Jak čałaviek, jaki častku žyćcia pražyŭ u maleńkim Staradarožskim rajonie, całkam hatovy padtrymać samy radykalny varyjant (sa skasavańniem abłaściej i ŭzbujnieńniem rajonaŭ). I voś čamu.
U 1939 hodzie na Staradarožčynie žyło ažno 53 tysiačy čałaviek, ź ich 49 tysiač — u vioskach. Zaraz, u 2019 hodzie, pavodle aficyjnaj statystyki, u rajonie zastałosia kala 19 tysiač žycharoŭ (dumaju, realnyja ličby jašče mienšyja). Pryčym u vioskach zastałosia kala 8-9 tysiač čałaviek. Kolkaść nasielnictva rajona źmianšałasia katastrafična jašče z 50-ych hadoŭ. Tady, niahledziačy na vysokuju naradžalnaść, kali ŭ žančyn było pa 4-6 dziaciej, nasielnictva ŭsio adno źmianšałasia, praz mocny mihracyjny adtok. Admoŭnaje mihracyjnaje salda zastajecca i zaraz, ale pry hetym niama i toj naradžalnaści, što była. Vioski prosta puściejuć na vačach, jak paśla niejkaj varožaj navały. Pačatkovaja škoła ŭ susiedniaj vioscy Budzieničy, kudy chadziła maja maci, daŭno zakrytaja, jašče ŭ časy jaje navučańnia. Škoły ŭ susiedniaj adnosna vialikaj vioscy Pałaževičy ŭžo taksama niama — tam zastalisia tolki jaśli-sad. Kali hladziš na hetyja zakinutyja kramy, škoły, młyny, kłuby, ty razumieješ, što nijakaha žyćcia, siamiejnaha, ekanamičnaha, kulturnaha, tam užo nikoli nie budzie. I z hetym treba prosta źmirycca. Minimum 3 faktary nie pakidajuć takim miescam nijakich šancaŭ. Heta i varvarskaja savieckaja kalektyvizacyja, jakaja razburyła haspadarčyja suviazi i viaskovy čałaviek razvučyŭsia pracavać, heta i sučasnaja hłabalizacyja, heta i sučasnaja demahrafičnaja stadyja, pry jakoj naradžalnaść vielmi nizkaja. Zachavać pamiać i tradycyi — najlepšaje, što my možam zrabić u takoj situacyi.
Čytajcie taksama: Piatnaccać rajonaŭ Biełarusi, jakija varta było b likvidavać
