U Śvietłahorsku ckujuć miascovuju pravaabaroncu, rasklejvajuć pra jaje chłuślivuju infarmacyju na aŭtobusnych prypynkach
Ciaham žniŭnia na aŭtobusnych prypynkach u Śvietłahorsku byli rasklejenyja nastupnyja ŭlotki: «Alena Maślukova ź Śvietłahorsku ličyć siabie pravaabaroncam i maryć źjechać u Jeŭrasajuz. Vykarystoŭvaje žycharoŭ horada u metach supraćstajańnia z uładami i atrymańnia statusu palitźniavolenaha albo palityčnaha prytyłku ŭ krainach Zachadu. Jana nie vyrašaje vašy prablemy! Jana vyrašaje svaje pytańni!»
Alena Maślukova — pravaabaronca z «Viasny», raniej jana pracavała ŭ škole nastaŭnicaj historyi, ale była zvolnienaja praz svaje pohlady. Ciapier spadarynia Alena vystupaje suprać zapusku ŭ Śvietłahorsku celułoznaha zavodu.
«Pabačyła hetuju ŭlotku 18 žniŭnia, kali my štotydzień prychodzim na centralnuju płošču suprać zavoda. Ulotku pryniesła maja kolišniaja kalažanka. Pačytali, paśmiajalisia. Potym vyrašyła pakazać heta svajoj niaviestcy, a jana kaža, što moj vučań takija ŭžo bačyŭ. Schadziła da jaho, jon mnie havoryć: «Spadarynia Alena, ja ŭžo asabista čatyry takija ŭlotki sarvaŭ».
Alena Maślukova 22 žniŭnia napisała zajavu ŭ milicyju, kab jany znajšli tych, chto vyrablaje i raspaŭsiudžvaje takuju pradukcyju. U milicyi da takoj zajavy pastavilisia sa skiepsisam, kaža pravaabaronca.
Alena Maślukova. Fota spring96.org.
Adnoj ź viersij, čamu takija ŭlotki mahli źjavicca ŭ Śvietłahorsku, Alena Maślukova ličyć, što ŭ internecie stali abmiarkoŭvać jaje parłamienckija ambicyi. «Pišuć, Alena, vyłučajsia, my ciabie padtrymajem. Ale kudy mnie vyłučacca, ja pravaabaronca, udzielničaju ŭ nazirańni za vybarami».
Spadarynia Maślukova kaža, što nie zasmuciłasia pra takuju ŭvahu da jaje. «Mnie napisali, što heta ŭžo pośpiech, kali niechta vyrašyŭ źviartacca pa-biełarusku. Nichto nie moža viedać, što ŭ inšaha čałavieka ŭ hałavie. Jak kaža moj muž: «Maja radyjacyja mnie daražej za ich banany».
